Illegally Mountain Cutting : डिचोली, कारापूर-सर्वण पंचायत क्षेत्रातील डोंगरकापणी प्रकरणी पोलिसांतर्फे गुन्हा नोंद करण्यात आला असून, या कृत्याची चौकशी सुरू झाली आहे.
वाठादेव येथील रोलिंगमिल परिसरात (प्रभाग-११) बेकायदेशीरपणे डोंगरकापणी करण्यात आल्याचा प्रकार उघडकीस आला आहे. या प्रकरणी डिचोली येथील नगर उपनियोजन कार्यालयातर्फे डिचोली पोलिसात तक्रार करण्यात आली असून पोलिसांनी नगर नियोजन कायद्यांतर्गत १७-अ या कलमाखाली गुन्हा नोंद केला आहे.
या प्रकरणात एका पंचसदस्याच्या जवळच्या नातेवाईकाचा हात असल्याचा संशय आहे. रोलिंगमिल-वाठादेव परिसरातील सर्व्हे नंबर-११६/० या जमिनीत मोठ्या प्रमाणात डोंगरकापणी करण्यात आली आहे. या जमिनीत २२ भूखंडही पाडण्यात आले आहेत. हा सारा प्रकार बेकायदेशीर असल्याची पंचायतीची तक्रार आहे.
या पार्श्वभूमीवर गेल्या महिन्यात (ता.२५ ) प्रशासकीय यंत्रणेने डोंगरकापणी केलेल्या परिसराची पाहणी केली होती. या संयुक्त पाहणीवेळी डिचोलीच्या संयुक्त मामलेदारांसह नगरनियोजन खात्याचे अधिकारी तसेच सरपंच दत्तप्रसाद खारकांडे आणि अन्य संबंधीत सरकारी कर्मचारी उपस्थित होते.
डोंगरकापणी बेकायदेशीरपणे करण्यात आल्याचे नगरनियोजन खात्याच्या अधिकाऱ्यांना पाहणीवेळी आढळून आले होते. संबंधीत जागेत चालू असलेली बेकायदा बांधकामे बंद ठेवण्याचे आदेशही त्यावेळी देण्यात आले होते. याप्रकरणी आवश्यक ती कारवाई करण्याच्या हालचालीही सुरु झाल्या होत्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.