Ganesh Chaturthi 2023 Vasco Goa SOP: गणेश चतुर्थीचा (चवथ) सण काही दिवसांवर येऊन ठेपला आहे. सार्वजनिक गणेशोत्सवाच्या पार्श्वभूमीवर वास्को पोलिसांनी मंडळांसाठी नियमावली जाहीर केली आहे.
नियमावलीनुसार, खासगी सुरक्षारक्षकाची नेमणूक करण्यासह मंडळाच्या ठिकाणी सीसीटीव्ही कॅमेरे बसवण्याची सूचना मंडळांना करण्यात आली आहे.
वास्को पोलिसांच्या वतीने सार्वजनिक गणेशोत्सव मंडळांची बैठक घेण्यात आली. वरिष्ठ पोलीस अधिकाऱ्यांसह गणेश मंडळाचे पदाधिकारी या बैठकीला उपस्थित होते. चतुर्थी शांततेत पार पडण्यासाठी सर्वांनी सहकार्य करण्याचे आवाहन पोलिसांनी केले. तसेच, यावेळी उत्सव काळासाठी नियमावली देखील जाहीर करण्यात आली.
उत्सवाच्या काळात पोलिसांकडून केवळ रात्रीच्या वेळी सुरक्षा देण्यात येईल. रात्री दहानंतर लाऊडस्पिकर आणि संगीत वाजवता येणार नाही. तसेच, उच्च न्यायालयाच्या आदेशानुसार लाऊडस्पिकरसाठी रितसर परवानगी घेण्याची गरज असल्याचे पोलिसांनी यावेळी सांगितले.
संशयास्पद कोणतीही व्यक्ती अथवा घटना समोर आल्यास याबाबत पोलिसांना तात्काळ 100 या नंबरवरती संपर्क साधून माहिती द्यावी. असेही पोलिसांनी यावेळी सांगितले.
अशी आहे पोलिसांनी नियमावली
1) मंडळासाठी खासगी सुरक्षारक्षकाची नेमणूक करणे, सीसीटीव्ही बसवणे
2) फक्त रात्रीच्या वेळी पोलीस बंदोबस्त
3) रात्री दहानंतर मोठ्या आवाजात संगीत वाजवता येणार नाही
4) साउंड सिस्टिम वापराच्या परवानगीसाठी अर्ज करावा
5) काहीही संशयास्पद आढळून आल्यास 100 नंबरवर पोलिसांना संपर्क साधावा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.