Vasco Fire Station: 170 आग दुर्घटनांमध्ये य़शस्वी मदत कार्य! वास्को अग्निशमन दलाची कौतुकास्पद कामगिरी

वास्को: गतवर्षी येथील अग्निशमन दलाने आग व अन्य घटना धरून एकूण ३५९ ठिकाणी मदत कार्य केले. या सर्व घटनांत सुमारे ३५,१२, ४५९ रुपये किमतीच्या मालमत्तेची हानी झाली तर १,०८, ८६, ९३० रुपये किमतीची मालमत्ता वाचविण्यात जवानांना यश आले.

आगीसंदर्भात १७० घटना घडल्या. १८९ अपघात व जनावरांना वाचविण्यासंदर्भातील घटना होत्या. आगीच्या घटनांत एकही जिवीत हानी झाली नाही. अपघातातील घटनांत तिघांना वाचविण्यात आले. तसेच १९ जनावरांचा जीव वाचविण्यात यश आले.

वास्को अग्निशमन दलाकडे मोठे ३ पाण्याचे बंब आहेत. तसेच ज्या अडगळीच्या ठिकाणी मोठे पाण्याचे बंब जाऊ शकत नाही त्यासाठी ताफ्यात सर्व प्रकारची उपकरणे असलेले छोटे वाहनही ताफ्यात आहे.

नव्या इमारतीची प्रतीक्षा

वास्को अग्निशमन दलाचे जवान नवीन इमारतीच प्रतीक्षेत आहेत. दहा वर्षांपूर्वी जुनी इमारत मोडकळीस आल्याने ती हटवून त्या ठिकाणी नवी इमारत उभारण्याचे काम मागील तीन वर्षांपासून सुरू आहे. सध्या आमदार कृष्णा साळकर यांच्या परिश्रमाने कामाला गती मिळाली आहे.