Vasco: अनर्थ टळला! अपार्टमेंटच्या 2 बाल्कनी कोसळल्या; वास्कोत जीर्ण इमारतींचा प्रश्न ऐरणीवर

वास्को: शहरातील अंतर्गत रस्त्याकडेला असलेल्या हॅप्पी अपार्टमेंटच्या दोन बाल्कनी आज कोसळल्या. सुदैवाने त्यावेळी रस्त्यावर कोणी नसल्याने मोठी आपत्ती टळली. मात्र या घटनेनंतर वास्को शहरातील मोडकळीस आलेल्या धोकादायक इमारतींचा प्रश्न पुन्हा ऐरणीवर आला आहे.

याप्रकरणी जिल्हाधिकारी कार्यालयाने गंभीर दखल घेऊन संबंधित इमारतीच्या मालकांनी त्या इमारतींसंबंधी योग्य निर्णय घेण्यासाठी पावले उचलावीत, अशी मागणी आमदार कृष्णा साळकर यांनी केली आहे.

संबंधित मालक जर आपल्या धोकादायक व मोडकळीस आलेल्या इमारती पाडण्यास राजी नसतील, तर सरकारने त्या इमारती पाडून त्यासाठी आलेल्या खर्च संबंधित मालकांकडून वसूल करावा, असेही यावेळी साळकर म्हणाले.

ही इमारत जीर्ण झाल्याने तसेच देखभाल होत नसल्याने धोकादायक ठरली आहे. यापूर्वीही ती चर्चेत आली होती. ही इमारत धोकादायक ठरल्याने लोक येथे राहत नाहीत. मात्र, या इमारतीच्या तळमजल्यावरील काही दुकाने अद्याप सुरू आहेत.

त्यामुळे तेथे लोकांची ये-जा सुरू असते. गेले काही दिवस सतत कोसळणाऱ्या पावसामुळे या इमारतीच्या दोन बाल्कनी कोसळल्या. सुदैवाने रस्त्यावर कोणी नसल्याने मोठी आपत्ती टळली. याप्रकरणी आमदार साळकर यांना माहिती मिळताच ते व त्यांची पत्नी नगरसेविका शमी साळकर तेथे पोहोचल्या.

त्यांनी इतर सरकारी यंत्रणांकडे संपर्क साधल्यावर तेथे पोलिस, वाहतूक पोलिस, अग्निशमन दल आले. त्यांनी वाहतुकीसाठी रस्ता बंद केला. अग्निशमन दलाने रस्त्यावरील चिरे, सिंमेंट काँक्रिट वगैरे हटविले.

संबंधितांवर कारवाई गरजेची, साळकर

याप्रकरणी साळकर यांनी येथील विविध धोकादायक इमारतींसंबंधी त्यांचे मालक कोणतीही दखल घेण्यास तयार नसल्याबद्दल संताप व्यक्त केला. येथील धोकादायक व जीर्ण इमारतींसंबंधी आपण गेली तीन वर्षे सातत्याने विधानसभेत प्रश्न उपस्थित करीत आहे.

येथील धोकादायक इमारतींचे काही मालक वास्कोबाहेर राहतात. त्यांना त्या इमारतींच्या सुरक्षितता, देखभालीसंबंधी काही देणेघेणे नसल्याचे दिसून येते. जे इमारती मालक आपल्या इमारतीच्या सुरक्षिततेसंबंधी गंभीर नाहीत, त्यांच्याविरोधात कारवाई करण्याची गरज साळकर यांनी व्यक्त केली आहे.