Vande Bharat Express: ‘वंदे भारत’ ठरेल पर्यटन वृद्धीचे महाद्वार! गोवा-मंगळुरूसाठी फायदेशीर

सुशांत कुंकळयेकर

मडगाव ते मंगळुरू या मार्गावर चालू झालेली ‘वंदे भारत’ ही ट्रेन गोवा तसेच मंगळुरू या दोन्ही प्रदेशांच्या पर्यटनवृद्धीचे महाद्वार ठरेल, असे मत दक्षिण मंगळुरू शहर मतदारसंघाचे आमदार वेदव्यास कामथ यांनी व्यक्त केले.

शनिवारी (ता.३०) मंगळुरू सेंट्रल या स्टेशनवरून दुपारी १२.१५ वाजता या रेल्वेला पंतप्रधान नरेंद्र मोदी यांनी आभासी पद्धतीने हिरवा झेंडा दाखविला. सर्वांनी जल्लोषात या रेल्वेचे स्वागत केले. यावेळी मंगळुरू-गोवा या मार्गावर ही रेल्वे सुरू व्हावी, यासाठी मोलाची भूमिका बजावणारे मंगळुरूचे खासदार नलीन कुमार कटील हेही उपस्थित होते.

लवकरच मंगळुरू-कोची वंदे भारत एक्स्प्रेस सुरू होणार, अशी घोषणा त्यांनी केली. अन्य दोन ठिकाणांशी मंगळुरूहून ‘वंदे भारत’ जोडली जाणार, असे त्यांनी सांगितले.

धार्मिक पर्यटनही वाढेल ः कामथ

कामथ म्हणाले, मंगळुरू शहरात जे कोकणी भाषिक राहतात त्यांचे कुळदेव गोव्यात आहेत. त्यामुळे मंगळुरू आणि गोवा यांच्यात नेहमीच संपर्क असतो. आता वंदे भारत सेमी सुपरफास्ट ट्रेन सुरू झाल्याने ते सकाळी मंगळुरूहून दुपारपर्यंत गोव्यात दाखल होऊ शकतील आणि आपली देवकार्ये उरकून परत सायंकाळी आपल्या गावी परतू शकतील. त्यामुळे गोव्यातील धार्मिक पर्यटनही वाढेल.