डिचोली: ‘घरांसह आमचा गाव आम्हाला हवा’ असा आक्रोश करत वन-म्हावळिंगे येथील लोकांनी आक्रमक पवित्रा घेत रस्त्यावर उतरून घरांच्या सर्वेक्षणाचे काम रोखून धरले. लोकांचा रुद्रावतार पाहून अधिकारी सर्वेक्षण न करताच माघारी फिरले.
उच्च न्यायालयाच्या आदेशानुसार, रस्त्याच्या बाजूला असलेल्या घरांचे सर्वेक्षण करण्यासाठी सोमवारी सरकारी अधिकारी वन गावात दाखल झाले. त्यांनी सर्वेक्षणाचे काम सुरू करताच लोक आक्रमक बनले. त्यांनी काम रोखून धरले. मोठ्या प्रमाणात तैनात असलेल्या पोलिस फौजफाट्याचीही लोकांनी पर्वा केली नाही. रस्त्यावर उतरलेल्या लोकांमध्ये महिलांची संख्या लक्षणीय होती. सरपंचांसह पंचायत मंडळ देखील रस्त्यावर उतरले होते.
दरम्‍यान, सर्वेक्षण करण्यासंबंधी कोणतीही पूर्वकल्पना देण्यात आली नव्हती, असा दावा ग्रामस्‍थांनी केला. यामागे सूत्रधार वेगळाच असल्‍याचा लोकांचा आरोप आहे.
डिचोलीचे मामलेदार दत्तप्रसाद तोरस्कर यांच्या मार्गदर्शनाखाली हे सर्वेक्षणाचे काम होणार होते. मात्र लोकांनी आक्रमक पवित्रा घेत काम रोखले. त्‍यामुळे पोलिस फौजफाटा मागविण्यात आला. मामलेदारांनी संतप्त लोकांची समजूत काढण्याचा प्रयत्न केला. तसेच या प्रकरणी उच्च न्यायालयात आव्हान याचिका दाखल करण्याचा सल्ला दिला. मात्र लोक काहीच ऐकून घेण्याच्या मनःस्थितीत नव्हते. ‘आमची घरे आम्हाला हवीत’ अशी एकच मागणी त्यांनी लावून धरली होती.
या प्रकाराची माहिती मिळताच मयेचे आमदार प्रेमेंद्र शेट यांनी वन येथे धाव घेऊन परिस्थितीचा आढावा घेतला. मी जनतेच्या पाठीशी असून लोकांना न्याय मिळालाच पाहिजे, अशी भूमिका त्यांनी घेतली. दुसऱ्या बाजूने या प्रकरणी न्यायालयात दाद मागण्यासंदर्भात विचार करण्यात येईल, असे म्हावळिंगे-कुडचिरे पंचायतीचे सरपंच मिथिल गावस यांनी सांगितले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
