Valpoi: वाळपईतील खचलेल्या रस्त्याची अखेर डागडुजी! माती वाहून जाण्याचा प्रकार थांबला, नागरिक समाधानी

वाळपई: भूमिगत वीज वाहिनीसाठी खोदलेल्या चरातील माती वाहून  जाण्याचा प्रकार वाळपईत घडला होता. परिणामी रस्ते चिखलमय झाले होते. यासंबंधी ‘गोमन्तक’मध्ये बातमी प्रसिध्द होताच संबंधित कंत्राटदाराने चर बुजवल्या.

वाळपई भागात संततधार  होत असलेल्या पावसामुळे जनजीवन  विस्कळीत झाले असून  मान्सूनपूर्व कामांवर मोठा परिणाम झाला आहे. त्यामुळे जोपर्यंत पाऊस कमी होत नाही, तोपर्यंत ही कामे पूर्ण होणार नाहीत.

सकाळपासून  टप्याटप्याने चर बुजवण्यासाठी  दगड घातले जात होते. व्याघ्रेश्वर सदनच्या रस्त्यावर आज संध्याकाळी दगड घालुन तात्पुरती सोय केली आहे. मात्र लवकरत लवकर रस्ता सुरळीत करावी, अशी मागणी केली जात आहे. मात्र, सध्या केलेल्या दुरुस्तीमुळे  येथील नागरिकांनी समाधान व्यक्त केले आहे.

पाऊस कमी झाला नाही तर दगडावरच वाहने हाकावी लागणार का, दगड ही तात्पुरती सोय, नाही तर या ठिकाणी वारंवार वाहतुकीसाठी अडथळा  निर्माण होणार असून अपघात होण्याची शक्यता आहे. वाळपई नगरगाव मार्गावर सकाळी दुचाकीस्वार महिला खड्ड्यात पडून जखमी झाल्याची घटना घडली. पावसामुळे खोदलेले रस्ते चिखलमय झाले असून काही वेळा खोदलेल्या रस्त्याचा अंदाज येत नाही. त्यामुळे अपघाताचे प्रमाण वाढण्याची शक्यता नाकारता येत नाही. 

सर्वत्र पाणीच पाणी

अवकाळी पावसाचा फटका मान्सूनपूर्व कामांवर झालेला आहे. घरे दुरुस्त करणे, पावसाळ्यात लागणारे साहित्य खरेदी आदी कामांवर मोठा परिणाम झाला आहे. वाळपईतील सरकारी कार्यालयांच्या दुरुस्तीकामावरही पावसाने पाणी फेरले आहे. पावसाळ्यात गळती होण्याऱ्या सरकारी इमारतीचे छत दुरुस्तीचे आदेश सरकारतर्फे देण्यात आले होते. त्यामुळे अजून काही इमारतीची दुरुस्ती सुरू आहे. त्यात वाळपई पोलिस स्थानक व बाल भवनच्या छताचे काम पूर्ण झाले आहे. मात्र उच्च माध्यमिक विद्यालयाची  बाजूची  इमारत,  तालुका ग्रंथालयाचे पूर्ण छत काढलेले आहे. त्यामुळे सर्वत्र पाणीच पाणी साचले आहे.