Illegal Mining: वाळपईत दोन अवैध चिरेखाणींवर पोलिसांचा छापा

Valpoi, Sattari

वाळपई सत्तरी येथील बेकायदेशीर चिरेखाणींचा प्रश्न पुन्हा निर्माण झालाय. रविवारी (दि. २९ सप्टेंबर) रोजी संध्याकाळी वाळपई पोलिसांनी अशा दोन बेकायदेशीर चिरेखाणींवर छापा टाकला असून तिथली सामान-सामग्री जप्त केली आहे.

रविवारी संध्याकाळी अचानक या बेकायदेशी खाणींवर छापा टाकून पोलिसांनी तिथे बेकायदेशीरपणे सुरु असलेली मशिनरी ताब्यात घेतली. या दोन्ही बेकायदेशीर खाणी मलपण आणि गवाणे या गावांमध्ये सुरु होत्या.

दरम्यान पोलिसांनी या दोन्ही ठिकाणांहून जनरेटर, ट्रक, JCB अशी २५ ते ३५ लाख रुपयांची मशिनरी जप्त केली आहे. गवाणे सत्तरी इथे सुरु असलेल्या बेकायदेशीर खाणीच्या संदर्भात चिरागदिन बेग (सय्यदनगर, वाळपई) तर मलपण सत्तरी येथील बेकायदेशीर खाणीच्या संदर्भात नासिर हुसेन जमादार (नुवा कॉलनी, वाळपई) यांचा समावेश आढळून आला आहे.

वाळपई पोलिसांनी दोघांना ताब्यात घेतले असून यापुढील तपासाची माहिती अजून पोलिसांनी माध्यमांना दिलेली नाही.