Mapusa: वझरान-वागातोर येथे किनाऱ्यावर मूलभूत सुविधांचा अभाव असल्याने या परिसरात पार्किंगसह योग्य रस्ता तसेच सार्वजनिक शौचालयांची व्यवस्था करावी, असे आवाहन करीत वझरानमधील शॅक मालकांनी शनिवारी 24 सप्टेंबर शिवोलीच्या आमदार दिलायला लोबोंना (Delilah Lobo) आपल्या मागण्यांचे निवेदन सादर केले.
दरम्यान, यासंदर्भात शॅकमालक श्रीधर गोलतेकर म्हणाले, कित्येक वर्षे हा किनारा प्रशासनाकडून दुर्लक्षितच आहे. या ठिकाणी योग्य रस्ता, पार्किंग व पथदीप नाहीत. तसेच चेंजिंग रुम व सार्वजनिक शौचालयांचा अभाव आहे. त्यामुळे पर्यटकांची विशेषतः महिलांची गैरसोय होते.
वझरान-वागातोर किनाऱ्यावर शौचालय तसेच विजेची समस्या प्रामुख्याने भेडसावते. त्यानुसार, येत्या मंगळवारी सकाळी जीटीडीसीच्या अधिकाऱ्यांसोबत आम्ही किनारी भेट देत पाहणी करणार आहोत. मुळात किनाऱ्यावर चेंजिंग रुम तसेच शौचालयांची नितांत गरज असते. तिथे पार्किंगचा अभाव आहे व पाण्याची समस्या आहे. यावर लवकरच तोडगा काढण्याचे आश्वासन मी संबंधितांना दिल्याची प्रतिक्रिया आमदार दिलायला लोबोंनी यावेळी दिली.
स्थानिक पंचायत व पर्यटन खात्यामध्ये समन्वय नसल्याने या किनाऱ्यावर अजूनही पथदीप नाहीत. वेळेत किनाऱ्यावर मूलभूत सुविधा उपलब्ध केल्या नाहीत, तर भविष्यात आमची उपजीविका ठप्प होईल, अशी भीती या शॅकमालकांनी व्यक्त केली आहे. तसेच सायंकाळनंतर अंधारामुळे पर्यटक येथे येण्यास घाबरतात.
याशिवाय येथे कचरापेट्या नाहीत, याकडे शॅकमालकांनी लक्ष वेधले. शॅक व्यवसायाच्या शुल्कवाढीसंदर्भात शॅकमालकांनी चिंता व्यक्त केली आहे. हा विषय मुख्यमंत्री, पर्यटनमंत्र्यांसमोर मांडणार आहोत, असेही लोबो यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
