पणजी: राज्यात 100 टक्के लसीकरण झाले असले तरी अद्याप लसीकरण मोहीम सुरूच आहे. लसीकरणाचे दोन्ही डोस घेतलेल्यांची संख्या आता 11 लाख 72 हजार 80 झाली असून हे प्रमाण 100.52 टक्के झाले आहे. राज्यात 11 लाख 66 हजार नागरिकांचे लसीकरणाचे लक्ष्य ठेवले होते. तर राज्यात बूस्टर डोस घेणाऱ्यांची संख्या 35 हजार 574 इतकी असून हे प्रमाण 28.62 टक्के इतके आहे. राज्यात बूस्टर डोस घेण्यासाठी पात्र असणाऱ्यांची संख्या 1 लाख 24 हजार 362 आहे. 15 ते 18 वयोगटातील पात्र मुलांची संख्या 74 हजार असून यापैकी 65 हजार 682 मुलांनी लसीकरणाचा पहिला डोस घेतला असून हे प्रमाण 88.76 टक्के आहे.
कोरोनाचे आणखी दोन बळी
राज्यात कोरोनाबाबत दिवसेंदिवस दिलासा मिळत असून गेल्या 24 तासांत कोरोनाचे 2 बळी असून अधिकच्या उपचारासाठी एका रुग्णाला दवाखान्यात भरती केले आहे. आज कोरोना पॉझिटिव्हिटी रेट 1.23 टक्के इतका खाली आला. शुक्रवारी सक्रिय रुग्णांची संख्या 347 इतकी होती, तर गेल्या 24 तासांत नवे 32 बाधित रुग्ण सापडले. राज्यात आज 90 जण कोरोनातून बरे झाले. तर उपचारासाठी भरती केलेल्या तिघांना रुग्णालयातून डिस्चार्ज देण्यात आला.
राज्यात 347 सक्रिय रुग्ण
राज्यात आतापर्यंत 2 लाख 44 हजार 938 नागरिकांना कोरोनाची बाधा झाली असून यापैकी 2 लाख 40 हजार 791 रुग्ण बरे झाले. हे रुग्ण बरे होण्याचे प्रमाण 98.31 टक्के इतके आहे. सध्या राज्यात 347 सक्रिय रुग्ण असून गेल्या 24 तासांत कोरोनामुळे दोघांचा मृत्यू झाल्याने एकूण मृत्यूचा आकडा 3 हजार 800 झाला आहे. शुक्रवारी 2,587 संशयित रुग्णांच्या चाचण्या घेतल्या. त्यापैकी 32 जणांना कोरोनाची लागण झाल्याचे स्पष्ट झाले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
