पणजी: राज्यातील (Goa) ज्या नागरिकांनी अद्याप कोरोना प्रतिबंधक लस (Vaccination) घेतली नाही, त्‍यांना ती घेण्‍यासाठी सुविधा व्हावी यासाठी आरोग्य खात्याने 16 सप्टेंबरपासून टीका उत्सव 3.2 सुरू केला. सरकारी इस्पितळे व आरोग्य केंद्रे येथील कायमस्वरुपी 40 लसीकरण केंद्रासह गावागावातील पंचायतींच्या मागणीनुसार एकूण 185 केंद्रांत हे लसीकरण होणार आहे.
यातील किमान 70 केंद्रे पुढील आठ दिवस दरदिवशी कुठे ना कुठे सुरूच राहणार आहेत. गोव्यात कोविड प्रतिबंधक पहिली लस 100 टक्के झाली आहे. मात्र, दुसरी लस अद्याप 55 टक्के लोकांनी घेतलेली नाही. उद्दिष्‍टपूर्ती करण्‍यासाठी विशेष लसीकरण मोहिमेंतर्गत आज दिवसभरात 12 हजार 839 एवढे लसीकरण झाले आहे.
पंतप्रधान नरेंद्र मोदी यांचा उद्या ऑनलाईन संवाद
पंतप्रधान नरेंद्र मोदी हे उद्या शनिवारी सकाळी 10.30 वा. कोविड प्रतिबंधक लस लाभार्थी व आरोग्य सेवा कर्मचाऱ्यांशी ऑनलाइन संवाद साधतील. पंतप्रधानांचा ऑनलाईन संवाद गोवा वैद्यकीय महाविद्यालयाच्या मुख्य व्याख्यान सभागृह, रवींद्र भवन, मडगाव, सांगे म्युनिसिपल सभागृह, राजीव कला मंदिर, फोंडा, म्युनिसिपल सभागृह साखळी, जुने आझिलो हॉस्पिटल सभागृह म्हापसा येथे थेट प्रसारित केला जाईल.
वरील प्रमुख ठिकाणांशिवाय राज्यातील सर्व ग्रामपंचायती आणि नगरपालिकांमध्ये संवाद थेट प्रक्षेपित केला जाईल. सर्व स्थानिक स्वराज्य संस्थांच्या निवडून आलेल्या प्रतिनिधींना त्यांच्या वॉर्डातील नागरिकांसह आपापल्या स्थानिक संस्थेच्या सार्वजनिक स्क्रिनिंगला उपस्थित राहण्याची विनंती करण्यात येत आहे. राज्यभरातील सर्व प्राथमिक, शहरी आणि सामाजिक आरोग्य केंद्रांवरही हा कार्यक्रम दाखविण्याची व्यवस्था केली आहे.
‘टिका उत्सव 3.2’ अंतर्गत राज्यात एकूण 185 केंद्रांत लसीकरण होणार आहे. एका दिवशी सुमारे 70 ते 75 केंद्रांवर लसीकरण पुढील 8 दिवस सुरूच ठेवण्‍यात येईल. लोकांनी याचा लाभ घ्‍यावा.
- डॉ. राजेंद्र बोरकर, लसीकरण मोहिमेचे प्रमुख.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.