फोंडा: उसगाव पंचायत क्षेत्रातील पार येथे ब्रेकर आणि जिलेटिनच्या साहाय्याने बेकायदा डोंगरकापणीसह दगडफोडीचे काम जोरात सुरू असून लोकांमध्ये भीतीचे वातावरण निर्माण झाले आहे. उसगावचे सरपंच प्रकाश गावडे यांनी आज पंचायत मंडळासह या ठिकाणाची पाहणी केली.
यावेळी त्यांच्यासोबत कोमुनिदादचे पदाधिकारी आणि तलाठीही उपस्थित होते. आम्ही अशा बेकायदेशीर कामांना थारा देणार नाही. यावर कडक कारवाई करण्यासाठी संबंधित खात्याकडे तक्रार करणार असल्याचे सरपंच प्रकाश गावडे यांनी सांगितले.
काही महिन्यांपूर्वी फोंडा पोलिसांनी या ठिकाणी लोकांच्या तक्रारीनुसार पाहणी केली होती; पण हे प्रकरण त्यांच्या अखत्यारीत येत नसल्याने त्यांनी संबंधित खाते व पंचायतीला याविषयी कारवाई करण्यासाठी कळविले होते; पण संबंधित खात्याच्या अधिकाऱ्यांनी याकडे डोळेझाक केल्याचे दिसून येते.
मिळालेल्या माहितीनुसार, सर्वे नंबर ९६/० या कोमुनिदादच्या जागेत गेल्या वर्षापासून सर्व खात्यांना अंधारात ठेवून बेकायदेशीरपणे डोंगर कापून दगडफोडीचे काम सुरू आहे. हे काम दिवसा बंद असते आणि रात्री जोरात सुरू असते. ब्रेकरद्वारे जमिनीला होल पाडून त्यात जिलेटिनच्या काड्या घालून स्फोट करतात आणि मोठमोठे दगड फोडतात. मोठ्या दगडाचे नंतर जेसीबीच्या ब्रेकरद्वारे बारीक तुकडे केले जातात. या ठिकाणाहून दररोज रात्री अनेक वाहनांमधून हे दगड नेले जात असल्याचे स्थानिकांनी सांगितले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.