Goa Illegal Hill Cutting: राज्यातील सर्व डोंगरकापणी 'बेकायदेशीर'! टीसीपी खात्याची मंजुरीच नाही; मंत्री राणेंचे स्पष्टीकरण

राज्यातील सर्व डोंगरकापणीचे प्रकार बेकायदा झालेले असून यातील एकाही प्रस्तावाला टीसीपी खात्याने मंजुरी दिलेली नाही, असे स्पष्टीकरण नगर नियोजन मंत्री विश्वजीत राणे यांनी दिले. यापुढेही नगर नियोजन खाते कुठेही डोंगरकापणीला मंजुरी देणार नाही, असे त्यांनी स्पष्ट केले. कुडतरीचे आमदार आलेक्स रेजिनाल्ड लॉरेन्स यांनी कुडतरी येथील डोंगरकापणीचे प्रकार मंत्री राणे यांना त्यांच्या मंत्रालयातील कक्षात जाऊन त्यांच्या निदर्शनास आणले.

या प्रस्तावात बेकायदेशीरपणा आढळून आल्यास या कोणत्याही प्रस्तावाला मान्यता दिली जाणार नाही हे मंत्री राणे यांनी स्पष्ट केले. राणे म्हणाले की, मागच्या तीन चार महिन्यांत आम्ही एकही डोंगरकापणी प्रस्तावाला मान्यता दिलेली नाही. असे प्रकार रोखण्यासाठी ग्रेडियंटमध्ये वाढ करण्याचीही आमची तयारी आहे.

मुख्यमंत्री प्रमोद सावंत यांचेही तेच धोरण आहे. गोव्यातील डोंगर आम्हाला राखून ठेवायचे आहेत, असे राणे म्हणाले. मडगाव येथील हॉस्पिसियो इस्पितळात डायोलेसिस सुविधांसह सर्व सुविधा उपलब्ध करून देऊ पण त्यापूर्वी सासष्टीतील सर्व आमदारांना विश्वासात घेऊ, असेही राणे यांनी यावेळी सांगितले.