Parking Problem: जुने गोवेत बेशिस्त पार्किंग

Parking Problem: जुने गोवेत अलीकडे मोठ्या प्रमाणात पर्यटक येत असल्यामुळे वाहनांची संख्याही वाढली आहे. शिवाय मार्गावर फोंडा, साखळी, माशेल परिसरातून येणारी वाहनेही याच मार्गाने ये-जा करतात. त्यामुळे या मार्गावर नेहमीच वाहतूक कोंडी होते.

चर्च परिसरातील रस्त्यांवर दोन्ही बाजूला ‘नो पार्किंग’चे फलक लावले असूनही त्या फलकांच्या समोरच वाहनांच्या रांगा लागलेल्या असतात. कोणीही वाहतूक नियमांचे पालन करीत नाहीत. शिवाय पोलिसही गायब असतात, त्यामुळे या परिसरात नेहमीच वाहतूक कोंडी होत असते.

सोमवारी (ता.२५) मोठ्या उत्साहात ख्रिसमस साजरा करण्यात आला. त्यात ख्रिसमसचा मोठा विकेंड आल्याने लाखोंच्या संख्येने पर्यटकांचे आगमन झाले आहे. सोमवारी ख्रिसमसच्या दिवशी जुने गोवेत पर्यटकांनी गर्दी केली होती.

त्यादिवशीही नियंत्रणासाठी असलेले पोलिस गायब झाले होते, त्यामुळे अनेकांना बराच वेळ वाहतूक कोंडीचा त्रास झाला. त्यानंतर शुक्रवार, शनिवारी मोठ्या प्रमाणात पर्यटकांची वाहने रस्त्यावरच उभी केल्यामुळे वाहनांना हा रस्ता पार करण्यास किमान २० मिनिटे लागली.

रविवार ३१ रोजी विकेंड आल्याने पर्यटक मोठ्या प्रमाणात येण्याची शक्यता आहे. त्यामुळे रविवारी वाहतूक पोलिसांची गरज आहे. संबंधितांनी या प्रकाराकडे लक्ष देण्याची गरज आहे, असे या भागातून प्रवास करणाऱ्यांचे मत आहे.

वाहतूक कोंडी!

जुने गोवे परिसरात बेकायदा पार्किंगमुळे वाहतूक कोंडी होत असून रुग्णवाहिका, अग्निशमन वाहनांनाही अडथळा निर्माण होत आहे. शिवाय दैनंदिन स्वच्छतेचाही या भागात अभाव आहे. त्यामुळे या परिसरात दुर्गंधी निर्माण झाली आहे. स्वच्छतेचे दूत, राष्ट्रपिता महात्मा गांधी यांच्या सर्कलजवळही कचऱ्यांच्या साम्राज्य पसरले आहे. त्यामुळे या भागात पर्यटकांनाही अस्वच्छतेला तोंड द्यावा लागते.