Ponda News : विठ्ठल भक्तांचा अनोखा उपक्रम!

फोंडा : पंढरीच्या पांडुरंगांच्या ओढीने चालत जाणाऱ्या वारकऱ्यांना भेटून त्यांच्यासोबत नामदिंडीत सहभागी होणे, नामस्मरण करणे, वारकऱ्यांचे पाय चेपून त्यांची सेवा करणे आणि प्रबोधनातून पंढरपूरच्या वारीचे महत्त्व पटवून देण्यासाठी फोंड्यातील गोमंतक संत मंडळाचे पदाधिकारी आणि काही विठ्ठल भक्तांनी काल एका दिवसाची वारी केली.

फोंड्याहून निघालेल्या या मंडळाचे पदाधिकारी आणि विठ्ठलभक्तांनी दोडामार्ग, तिळारी मार्गे कोल्हापूर जिल्ह्यापर्यंत जाऊन आपली एका दिवसाची सेवा वारकऱ्यांना समर्पित केली. यावेळी कीर्तनकार सुहास वझेबुवा, देवानंद सुर्लकर, राजेंद्र गावडे, संतोष कुर्टीकर, विष्णू गवस, दत्ता मावजेकर, मनोज वझे, रवींद्र कामत, रामदास वळवईकर, किशोर गावडे, पत्रकार सदानंद सतरकर व नरेंद्र तारी यांच्यासमवेत मनिषा दामले, प्रभावती वझे, रचना वळवईकर, भक्ती वळवईकर व इतरांनी या एका दिवसाच्या वारीत सहभागी होऊन वारीचा आनंद लुटला.

या वारीत प्रबोधनात्मक उपक्रम साकारताना पंढरपूरच्या वारीचे महत्त्व तसेच आजची समाज व्यवस्था आणि कला संस्कृतीचे रक्षण व मुलांवरील संस्कार आदीसंबंधीची माहिती वारकऱ्यांना देण्यात आली. कीर्तनकार सुहास वझेबुवा यांनी नामस्मरण दिंडीत गायन तसेच वादन केले. पंढरपूरच्या वाटेवरील आठ दिंडी पथकांना भेटून ही सेवा करण्यात आली. त्यात दिंडीतील वारकरीही सहभागी झाले होते.

एका दिवसाची वारी!

पंढरपूरला आषाढी एकादशीनिमित्त पंढरपूरला पायी वारी करणाऱ्या वारकऱ्यांची संख्या सुरवातीला सीमित होती, पण आता वारकरी आणि दिंड्यांची संख्याही वाढली आहे. पंढरपूरला एका दिवसाची वारी करून वारकरी थांबतात, आणि पुढील वर्षाची वाट पाहतात, पण पंढरपूरच्या वारीप्रमाणे जर गोव्यातही विविध ठिकाणी वारकऱ्यांनी एका दिवसाची तीन ते चार महिन्यांनी वारी काढली.

किमान वीस किलोमीटर वारकरी तसेच महिला आणि मुलांच्या सहभागाने एखाद्या मंदिरापासून पाया वारी सुरू केली, वाटेतील मंदिरांत नामस्मरण, भक्ती महोत्सव, दिंडी, प्रवचन, प्रबोधन आदीसारखे प्रकार हाती घेतले तर पुढील पिढीपर्यंत ही वारी सशक्तपणे आपण पोचवू शकू आणि परमेश्‍वराचीही भक्ती साधू शकू, असे कीर्तनकार सुहास वझेबुवा यांनी आपल्या प्रबोधनात यावेळी वारकऱ्यांना सांगितले.