Panjim Smart City: ‘स्मार्ट सिटी’ची ऐशीतैशी...

Panjim Smart City: स्मार्ट सिटी मिशन अंतर्गत सांतिनेज परिसरातील मलनिस्सारण वाहिनी टाकण्याचे स्मार्ट रस्त्याचे काम गेले आठ-नऊ महिन्यांपासून सुरू आहे. दोन्ही बाजूला गटाराचे काम करण्यास वेग आला असल्याने येथील परिसरात धुळीमुळे खाणव्याप्त गावात गेल्यासारखा भास पणजीकरांना आता होऊ लागला आहे.

पणजी शहर परिसरातून सांतिनेजमधूनच टोंका येथे मुख्य भूमिगत मलनिस्सारण वाहिनी नेण्याचे काम सुरू झाले. पावसाळ्यापूर्वी हे काम सुरू झाले, पण ते अजूनपर्यंत संपण्याचे काही नाव घेत नाही. वाहिन्यांचे चेंबरच्या निर्मितीचे काम सुरू झाले आहे. सध्या सांतिनेजमधील विवांता हॉटेल सिग्नल चौकापासून टोंका आणि वेलनेस मेडिकलपासून ते मधुबन सोसायटी रस्त्याच्या बाजूच्या गटारांचे काम सुरू आहे.

गटाराचे काम सुरू असल्याने खोदकाम केल्यानंतर काढलेल्या मातीने अर्धा रस्ता व्यापला आहे. ये-जा करणाऱ्या वाहनांमुळे माती रस्त्यावर पसरली आहे. दुचाकीस्वारांना येथून ये-जा करताना नकोसे झाले आहे. महानगरपालिकेने इमेजीन पणजी स्मार्ट सिटी विकास लिमिटेडकडे (आयपीएससीडीएल) शहराचा ताबाच दिल्यासारखे आता दिसत आहे.

सध्या शहरात मलनिस्सारण वाहिन्या टाकण्याची कामे जोरदार सुरू आहेत, तर दुसरीकडे काही रस्ते स्मार्ट करण्याचेही काम सुरू आहे. त्यामुळे पणजीत वाहनांना पार्किंगला जागा मिळत नाही. त्यामुळे रस्त्यांवर एका बाजूला दुहेरी पार्किंग केलेली वाहने दिसतात. त्यामुळे शहरातील अनेक रस्त्यांवर दिवसभर वाहतूक कोंडी होत आहे.

सांतिनेज परिसरात प्रवास नकोसा

सध्या दररोज सांतिनेज परिसरातून ये-जा करण्याशिवाय पर्याय नसलेल्यांना प्रवास नकोसा झाला आहे. या भागातील रस्त्याच्या बाजूला उभे केलेले वाहन काही मिनिटांतच धुळीने माखलेले दिसते. मलनिस्सारण वाहिनी टाकण्याचे काम नगरविकास प्राधिकरणाकडे (जीसूडा) आहे. कामाची गती दिसत असली तरी हे काम आणखी किती महिने चालणार हे काही सांगता येत नाही.