गोव्यात पंचायत निवडणुकीच्या अनिश्चिततेमुळे गोंधळाचे वातावरण

फोंडा : निवडणुका कधी होणार, याचा मागमूस नसल्यामुळे सध्या राज्यातील पंचायती अनिश्चितच्या गर्तेत सापडल्या आहेत. त्यामुळे सर्वत्र गोंधळाचे वातावरण दिसत आहे. (uncertainty about panchayat election in Goa)

फोंडा तालुक्यातील काही पंचायतींच्या ग्रामसभा संपल्या असून काही व्हायच्या आहेत. पण या ग्रामसभेत औपचारिकताच जास्त दिसते. पंचमंडळी आपण त्या गावचे नव्हेच, अशा रीतीने वावरताना दिसतात. याचा अनुभव कुर्टी खांडेपार येथे आला. या ग्रामसभेला ११ पैकी पाच पंच गैरहजर होते. स्क्रॅप यार्डचा विषय ऐरणीवर असूनसुध्दा हे पंच अनुपस्थित राहिले. कारवाई करायची तर पंचांची मुदत संपत आली आहे.

‘ट्रिपल टेस्ट’ पर्याय : परत निवडणुका कधी होणार हे माहिती नसल्यामुळे एरवी शिगेला पोहचलेल्या प्रचारातही आता शिथिलता आली आहे. निवडणूक आयोगाने आरक्षणाशिवाय निवडणूक घ्या, असे सांगितले असले तरी सरकार हा सल्ला मान्य करेल असे वाटत नाही. कारण याविरुध्द न्यायालयात याचिका दाखल होऊ शकते. त्यामुळे आता सरकारपुढे ‘ट्रिपल टेस्ट’ करूनच ही निवडणूक घेण्याचा पर्याय राहिला आहे. हे पाहता या निवडणुका मुदतीत होतील असे वाटत नाही.

पंचायत निवडणुका मुदतीत व्हाव्यात. वास्तविक सरकारने ही प्रक्रिया आधीच पार पाडायला हवी होती. आता आरक्षणाच्या घोळामुळे या निवडणुका पुढे जाऊ शकतात. याचा परिणाम गावाच्या विकासावर होऊ शकतो. आता काही उपाय योजता येतो का, हे बघणे सरकारच्या हातात आहे.

- घन:श्‍याम नाईक, प्रियोळ