वास्को: उमेश हरिजन (33) यांच्या हत्येप्रकरणी अटक करण्यात आलेले दोन आरोपी अमीर हुसेन आणि दीपक सहानी यांना मंगळवारी वास्को पोलिसांनी वास्को न्यायदंडाधिकाऱ्यांसमोर हजर केले असता त्यांना 7 दिवसांची पोलीस कोठडी सुनावली आहे.
(Umesh Harijan murder case Amir Hussain and Deepak Sahani remanded 7 day police custody)
तीन आरोपींचा शोध सूरुच
वास्को पोलीस आणखी तीन आरोपींचा शोध घेत असून आरोपींना पकडण्यासाठी ठिकठिकाणी नाकाबंदी व कोम्बिंग ऑपरेशन सुरू केले आहे. पोस्टमॉर्टम तपासणी अहवालानुसार मृताचा मृत्यू गंभीर वार आणि फुफ्फुसाला झालेल्या जखमांमुळे झाला, असा खुलासा वास्को उपविभागाचे पोलीस उपअधीक्षक राजेश कुमार यांनी केला.
काटेबायणा येथे सोमवारी भर दुपारी चौघांनी कोयता व चाकूने सपासप वार करून उमेश हरिजन (30, रा. हाऊसिंग कॉलनी, बायणा) या तरुणाची निर्घृण हत्या केली. पूर्ववैमनस्यातून हा प्रकार घडला. चार संशयितांपैकी दोघांना फोंडा पोलिसांनी पाठलाग करून पकडले आणि मुरगाव पोलिसांच्या ताब्यात दिले. दीपक सहानी आणि अमिर अशी या संशयितांची नावे आहेत.
नेमके काय घडले ?
उमेश हा सोमवारी दुपारी तीनच्या सुमारास बायणातील सार्वजनिक गणेशोत्सव मंडपात आला होता. तेथे श्रींचे दर्शन घेऊन महापूजेचा महाप्रसाद घेऊन निघाला होता. त्याच्यासोबत मित्र अशोक चलवादी होता. ते काटेबायणा येथील उड्डाणपुलाजवळ पोहोचले असता तेथे दबा धरून बसलेल्या चौघांनी त्यांना अडविले व उमेशला उड्डाण पुलाखाली नेले. तेथे त्याच्यावर कोयता आणि चाकूने हल्ला करण्यात आला.
या हल्ल्यात उमेश गंभीर जखमी झाला. हा प्रकार घडत असताना अशोकने उमेशच्या भावाला माहिती दिली. भाऊ विजय तेथे कार घेऊन येईपर्यंत हल्लेखोरांनी घटनास्थळाहून पळ काढला. उमेशला उपचारासाठी चिखली उपजिल्हा इस्पितळात नेण्यात आले. परंतु तेथील डॉक्टरांनी मृत घोषित केले.
उमेश याने दीड वर्षापूर्वी चार संशयितांपैकी एकाच्या भावाला मारहाण केली होती. तो राग मनात ठेवून त्या चौघांनी सोमवारी दुपारी डाव साधला, अशी माहिती पोलिसांनी दिली आहे.दरम्यान आज मंगळवारी वास्को पोलिसांनी न्यायदंडाधिकारी प्रथमवर्ग वास्कोसमोर हजर केले असता त्यांना 7 दिवसांची पोलीस कोठडी सुनावण्यात आली आहे.
दरम्यान वास्को पोलिसांनी बायणा आणि मांगोरहील परिसरात आज गस्त कायम ठेवली आणि काल बायणा येथे झालेल्या हत्येच्या पार्श्वभूमीवर हिस्ट्री शीटर्स आणि रोडरोमीयोंना तपासले. सर्वांना ताकीद देण्यात आली असून वास्को पोलीस अशा गुन्ह्यांविरोधात कडक कारवाई करतील आणि गुन्हा करणाऱ्यांना कोणतीही दया माया पोलीस दाखवणार नसल्याचा इशारा दिला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
