Uma Patil Case: पैसे मागितल्यास 'उमा' द्यायची धमकी! दहा वर्षांत जमवली लाखोंची माया; वास्कोप्रकरणी 'दीक्षा'विरुद्धही नोटीस जारी

Uma Patil Cash For Job

वास्को: वास्को येथे सरकारी नोकऱ्यांचे आमिष दाखवून उमा पाटील हिने गेल्या आठ-दहा वर्षांपासून काहीजणांची फसवणूक करून बरीच माया जमविली होती. उमाने फक्त सरकारी नोकरीचे आमिष दाखवून फसवणूक केली असे नाही, तर काहीजणांना स्वस्तात फ्लॅट, प्लॉट देण्याचे आमिष तिने दाखविले आणि त्यांच्याकडून पैसे घेतले होते.

उमा आणि तिचा मुलगा शिवम यांच्याविरोधात चिंचवाडा-चिंबल, रायबंदर येथील रश्मी चोपडेकर यांनी बुधवारी तक्रार दाखल केली होती. त्यानंतर बायणातील केंचव्वा मदार यांनी गुरुवारी पोलिसांत तक्रार दाखल केली आहे.

पैसे मागितल्यास धमकी

नोकरी, फ्लॅट-प्लॉटसाठी दिलेले पैसे मागण्यासाठी तिच्या घरी येणाऱ्यांना ती निरनिराळ्या पद्धतीने धमकावत असे. त्यामुळे त्या लोकांनी पोलिसांत तक्रारी करण्याऐवजी गप्प राहाणेच पसंत केले होते. मुख्यमंत्री डॉ. प्रमोद सावंत यांनी केलेल्या आवाहनानंतर पीडित लोक पुढे येऊ लागले आहेत.

दीक्षाविरुद्ध नोटीस जारी

वास्को येथील सरकारी शाळेत शिपायाची नोकरी देण्याच्या बहाण्याने बायणा येथील एका महिलेची ३ लाखांची फसवणूक केल्याप्रकरणी वास्को पोलिसांनी दीक्षा तळवणेकर हिच्याविरुद्ध गुन्हा नोंदवला. पोलिस दीक्षाच्या घरी गेले असता ती तेथे नव्हती. तिला पोलिस स्थानकात हजर राहण्यासाठी नोटीस बजावली आहे.