Uday Madkaikar : उदय मडकईकर यांचे बाबूश यांच्याशी ‘गुफ्तगू’

Uday Madkaikar : विधानसभा निवडणुकीपूर्वी दूरावलेले माजी महापौर तथा नगरसेवक उदय मडकईकर आणि माजी नगरसेवक दया कारापूरकर यांची आमदार बाबूश मोन्सेरात यांच्याबरोबर शहरातील एका मध्यवर्ती ठिकाणच्या हॉटेलमध्ये बराच वेळ चर्चा झाली. त्यामुळे या दोघांचे मोन्सेरात यांच्याशी पुन्हा सूत जुळण्याची शक्यता आहे. हा विषय महापालिका वर्तुळात चर्चिला जाऊ लागला आहे. परंतु अशी चर्चा झाली नसल्याचे या तिघांचेही म्हणणे आहे.

अधिकृत सूत्रांकडून मिळालेल्या माहितीनुसार, गुरुवारी सायंकाळी ही चर्चा झाली. त्यामुळे मडकईकर पुन्हा आमदार मोन्सेरात यांच्या गटात जाणार, अशी चिन्हे दिसू लागली आहेत. यापूर्वी झालेल्या महापालिकेच्या बैठकीत मडकईकर यांनी रस्ता डांबरीकरणाचा विषय उकरून काढला होता. त्यावेळी त्यांनी कंत्राटदारावर निशाणा साधला होता. आमदार किंवा महापौर यांच्याबाबत त्यांनी नरमाईचे धोरण स्वीकारल्याची चर्चाही महापालिकेत होती. त्यामुळे आता जुने साथीदार पुन्हा एकत्रित येणार, अशी चिन्हे दिसतात.

जुने साथीदार एकत्र येणार

राजकारण आणि मैत्रीबाबत आमदार बाबूश मोन्सेरात हे तत्त्व पाळणारे आहेत, असे त्यांच्या जवळचे सहकारी सांगतात. मडकईकर यापूर्वीही त्यांच्यापासून दुरावले होते, पण पुन्हा मोन्सेरात यांच्याशी त्यांनी जुळवून घेतले. आता पुन्हा ते त्यांच्याशी जुळवून घेण्याच्या प्रयत्नात असल्याचे दिसते.

जुळवून घेण्याशिवाय पर्याय नाही

विधानसभा निवडणुकीपूर्वी काँग्रेसला उमेदवार मिळत नव्हता. त्यामुळे मडकईकर यांनी काँग्रेसकडून निवडणूक लढविण्याची तयारी केली होती. टोनी रॉड्रिग्स यांच्याशी सख्य असल्याने त्यांनी ताळगावात काँग्रेसच्या प्रचारात सक्रियपणे सहभाग दर्शविला होता. परंतु महापालिका ताब्यात असल्याने आणि राज्यात बाबूश हे मंत्री असल्याने दोघांनाही जुळवून घेण्याशिवाय पर्याय नसल्याचे काही नगरसेवक नाव न प्रसिद्ध करण्याच्या अटीवर सांगत होते.