मडगाव: सरकारी नोकरी मिळविण्‍यासाठी ५ लाख रुपये द्यावे लागतात, असे वादग्रस्‍त विधान आपल्‍या ‘उटा संघर्ष’ या पुस्‍तकात केल्‍यामुळे काही वर्षांपूर्वी चर्चेत आलेले शिक्षण खात्‍याचे सहाय्‍यक संचालक डॉ. उदय गावकर यांनी सीसीएस कायद्याच्‍या ९व्‍या कलमाचा भंग केल्‍याचा ठपका ठेऊन त्‍यांना ताकीद देण्‍याची शिक्षा सुनावण्‍यात आली आहे.
विधानसभेत विचारलेल्‍या एका अतारांकित प्रश्‍नाच्‍या उत्तरातून ही माहिती पुढे आली आहे. यासंबंधी डॉ. गावकर यांची चौकशी करावी असे शिक्षण खात्‍याकडून दक्षता विभागाला सांगण्‍यात आले होते. दक्षता खात्‍याने या प्रकरणात डॉ. गावकर हे प्रथमदर्शनी दोषी सापडल्‍याने त्‍यांना एका ‘सेन्‍स्‍युअर’ (कडक शद्बातील ताकीद किंवा कमी स्वरूपाचा दंड) देण्‍याची शिफारस केल्‍याचे या उत्तरात म्‍हटले आहे. ८ जानेवारी २०२५ रोजी दक्षता खात्‍याने हा आदेश दिला होता.
उटा या संघटनेचे विशेष सचिव असलेले डॉ. गावकर यांनी ‘उटा संघर्ष’ हे पुस्‍तक लिहिले होते. उटा संघटनेच्‍या आर्थिक सहाय्‍यातून हे पुस्‍तक प्रकाशित करण्‍यात आले होते. या पुस्‍तकातील एका प्रकरणात डॉ. गावकर यांनी, ‘सरकारी नोकरी मिळण्‍यासाठी उमेदवारांना ५ लाख द्यावे लागतात, उलट एसटी उमेदवारांना आरक्षण असल्‍यामुळे त्‍यांना हे पैसे द्यावे लागत नाहीत’ अशा आशयाचा उल्‍लेख केला होता.
त्‍यानंतर वास्‍कोचे आमदार दाजी साळकर यांनी विधानसभेत हा मुद्दा उपस्‍थित केला होता. शिक्षण खाते सांभाळणारे मुख्‍यमंत्री प्रमोद सावंत यांनी यासंबंधी चौकशी करण्‍याचे आश्‍वासन त्‍यावेळी दिले होते.
त्‍यानंतर २ नोव्‍हेंबर २०२२ या दिवशी शिक्षण खात्‍याने यासंबंधी दक्षता खात्‍याने चौकशी करावी अशी मागणी करणारे पत्र पाठविले होते. दक्षता खात्‍याने ८ जानेवारी २०२५ रोजी डॉ. गावकर यांना ही सौम्‍य प्रकारची शिक्षा ठोठावली होती.
योग्‍यप्रकारे निवडणूक घेतली नाही असा ठपका ठेऊन दक्षिण गोवा जिल्‍हा प्रबंधकांनी निर्बंध घातलेल्‍या गोमंतक गौड मराठा समाज या संस्‍थेवर प्रशासक नेमण्‍याचा निर्णय सरकार पातळीवर घेण्‍यात आला असून एक दोन दिवसांत या संस्‍थेवर प्रशासक नेमला जाईल अशी माहिती संबंधित सूत्राकडून मिळाली आहे. या संस्‍थेवर प्रशासकाची नेमणूक करावी, अशी शिफारस दक्षिण गोवा जिल्‍हा निबंधक सूरज वेर्णेकर यांनी केली होती. दरम्‍यान, या प्रकरणाची सुनावणी १८ ऑगस्‍ट रोजी जिल्‍हा निबंधकासमोर येणार आहे तर उटा संदर्भातील सुनावणी १३ ऑगस्‍ट रोजी ठेवण्‍यात आली आहे. ही सुनावणी २३ जुलै रोजी होती. मात्र ती काही कारणास्‍तव तहकूब करण्‍यात आली होती.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
