Goa Accident: सेरावली-वेर्णा येथे दुचाकीच्या धडकेत सायकलस्वाराचा मृत्यू, तर तेरेखोल नदीत कोसळली कार

Goa Accident: सेरावली - वेर्णा येथे दुचाकीच्या धडकेत सायकलस्वाराचा मृत्यू झाला आहे. तर, तेरेखोल धक्क्यावरून पर्यटक कार नदीत कोसळल्याची सारमानस नंतर दुसरी घटना समोर आली आहे. सुदैवाने या घटनेत कोणतीही जिवीतहानी झाली नाही.

सेरावली-वेर्णा येथे दुचाकी आणि सायकलचा अपघात झाला. यात गंभीर जखमी झालेल्या आंतानिओ मास्कारेन्हस (वय 73, रा. शिर्ली) या वृद्ध सायकलस्वाराचे निधन झाले आहे.

याप्रकरणी मोहम्मद खान (रा. चिंबल) याच्या विरोधात गुन्हा नोंद करण्यात आला आहे.

तर, सारमानस येथील फेरीबोटीच्या धक्क्याजवळ कार नदीत कोसळल्याची घटना ताजी असताना शुक्रवारी आणखी कार धक्क्यावरून नदीत जाण्याची घटना घडली.

तेरेखोल येथील फेरीधक्क्यावर सायंकाळी साडेपाचच्या सुमारास पर्यटक कार नदीत कोसळली. फेरीबोटीवरील कर्मचारी व येथील नागरिकांनी कार नदी पात्रातून बाहेर काढली. उत्तर प्रदेशमधील कारचालक ध्रुव राकेश मित्तल याला सुखरुप बाहेर काढण्यात आले.