पणजी: काँग्रेस पक्षाने पक्षांतर करणाऱ्या आणि विश्वासघात करणाऱ्यांसाठी सर्व दरवाजे बंद केले आहेत. लोकशाही आणि संविधानाची हत्या करणाऱ्यांविरुद्ध न्याय मिळेपर्यंत आम्ही लढा देऊ. काँग्रेसमध्ये घातकी व पातकींना अजिबात थारा नाही, असे सांगत अमित पाटकर यांनी काँग्रेसमधून बाहेर पडलेल्या आठ आमदारांच्या फुटीरपणावर जोरदार हल्लाबोल केला.
काँग्रेसच्यावतीने आज उत्तर गोव्यात कळंगुट व जुने गोवे, तर दक्षिण गोव्यात वास्को आणि मडगावात फुटीर आमदारांच्या विरोधात निषेध करण्यात आला.
काँग्रेसच्या तिकिटावर निवडून येऊन आठ आमदारांनी भाजपमध्ये केलेल्या पक्षांतराला दोन वर्षे पूर्ण झाल्यानिमित्त हा कार्यक्रम आयोजित करण्यात आला होता. त्याचा एक भाग म्हणून फुटीर आमदारांच्या प्रतिकात्मक पुतळ्याचे दहन करण्यात आले. याप्रसंगी विरोधी पक्षनेते युरी आलेमाव, आमदार कार्लुस फेरेरा व इतर काँग्रेसचे पदाधिकारी उपस्थित होते.
युरी आलेमाव म्हणाले, आमदार फुटीप्रकरणी सभापती तवडकर यांनी ९० दिवसांत निकाल द्यायला हवा होता, पण ९०० दिवस ओलांडले तरी ते निकाल देत नाहीत. भाजप सरकार आदेश देतो तसे सभापती काम करतात. २०२७ मध्ये जे फुटीर आहेत, त्या सर्वांना जनता घरी पाठवतील. आमदार फुटले तेव्हाच आम्ही आमची भूमिका स्पष्ट केली होती, आम्ही पक्षाशी एकनिष्ठ राहिलो आहोत. आमदार खरेदी किंवा विक्रीच्या गटात आम्ही मोडत नाही.
भाजपच्या तिकिटावर निवडणूक लढवली तर आपण पराभूत होणार, हे मायकल यांना माहीत होते. त्यामुळेच त्यांनी काँग्रेसमध्ये प्रवेश केला. त्यांनी एका मुलाखतीत सांगितले की, मी काँग्रेस पक्ष कधीही सोडणार नाही व विकासासाठी आपण पुन्हा भाजपमध्ये प्रवेश केल्याचे त्यांनी सांगितले. हे सर्व पक्षांतर करणारे सामान्यांसाठी नव्हे, तर त्यांच्या वैयक्तिक अजेंड्यासाठी होते. सभापतींनी पक्षांतराच्या याचिकेवर लवकर निर्णय घ्यावा अन्यथा सर्वोच्च न्यायालय सुनावणी घेईल. मला विश्वास आहे की हे आमदार अपात्र ठरतीलच. त्यांचा विलीनीकरणाचा युक्तिवाद फोल ठरेल, असे आमदार कार्लोस फेरेरा यांनी नमूद केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.