जुने गोवे ठाण्यामध्ये दोन पोलिसांमध्ये जुंपली

पणजी: जुने गोवे पोलिस स्थानकात दोन पोलिस कर्मचाऱ्यांनी आज संध्याकाळी एकमेकाला मारहाण करण्याची घटना घडली. याप्रकरणी पोलिस निरीक्षकांनी या दोघांविरुद्ध दखलपात्र गुन्हा दाखल केला आहे.

रात्री उशीरा मिळालेल्या माहितीनुसार या दोन्ही कर्मचाऱ्यांना निलंबित करण्यात आले. जुने गोवे पोलिस निरीक्षकांनी दिलेल्या माहितीनुसार साहाय्यक पोलिस उपनिरीक्षक ज्युलिओ दिनीझ आणि पोलिस हवालदार समीर फड़ते यांच्यात आज संध्याकाळी सुरुवातीला बाचाबाची झाली होती.

त्यानंतर त्याचे पर्यवसान एकमेकांना मारहाण करण्यामध्ये झाले. मारहाणीच्या प्रकरणानंतर समीर फडते हा पोलिस स्थानकातून निघून गेला, तर ज्युलिओ याची वैद्यकीय तपासणी करण्यात आली. ड्युटीवर असताना पोलिस कर्मचाऱ्यांनी नियमांचे उल्लंघन केल्याप्रकरणी त्यांच्याविरुद्ध गुन्हा दाखल करण्यात आला आहे. गेल्या काही दिवसांपासून या दोघा पोलिस कर्मचाऱ्यांमध्ये वाद सुरू होता. त्यांच्यात अधूनमधून खटके उडत होते.