Goa Accident: गवंडाळी-खोर्ली येथे रिक्षा-दुचाकी अपघातात दोघांचा मृत्यू

Goa Accident: गवंडाळी-खोर्ली येथे काल रात्री रिक्षा व दुचाकीमध्ये काल रात्री झालेल्या अपघातात दुचाकीवरील विजय सावळो गावडे (40) व प्रशांत उत्तम गावडे (30) या दोघा चुलत भावांचा मृत्यू झाला.

याप्रकरणी जुने गोवे पोलिसांनी अपघाताची नोंद करून रिक्षा चालकाविरुद्ध सदोष मनुष्यवधाचा गुन्हा दाखल केला आहे. त्याला अटक करण्यात आली आहे.

जुने गोवे पोलिसांनी दिलेल्या माहितीनुसार फणसवाडा - नावेली येथील दोघेही चुलत भाऊ हे काल रात्री खोर्ली येथे आपल्या नातेवाईकांकडे गवंडाळी येथील रस्त्याने जात होते. यावेळी समोरून रिक्षा येत होती.

गवंडाळी येथे जाणारा रस्ता अरुंद असल्याने भरधाव वेगात असलेल्या या दुचाकीने रिक्षाला समोरून धडक दिल्यानंतर सोनाली पिंटो घराजवळ असलेल्या संरक्षक भिंतीला त्या दोघांचे डोके आपटले.

त्यामुळे दोघांच्या डोक्याला जबर दुखापत झाली. त्या दोघांना रुग्णवाहिकेने गोमेकॉ इस्पितळात नेण्यात आले. तथापि, डॉक्टरांनी त्यांना मृत घोषित केले. याप्रकरणी रिक्षा चालक शिवलिंग रामा नाईक (40 वर्षे, कुंभारजुवे) याच्याविरुद्ध भादंसंच्या कलम 279, 304 (अ) खाली गुन्हा नोंदवण्यात आला आहे.