सौझा लोबो प्रकरणात तब्बल दोन कॉन्स्टेबल निलंबित!

Calangute Souza Lobo case: पोलिस निरीक्षक नोलास्को रापोसो यांना सौझा लोबो रेस्टॉरंट हल्ला प्रकरणातील तपासात चुकीची हाताळणी केल्याबद्दल निलंबित केल्यानंतर दोन दिवसांनंतर, शनिवारी कळंगुट पोलिस ठाण्यातील दोन पोलिस हवालदारांचा या प्रकरणात सहभाग असल्याचा संशय असल्याने त्यांना देखील निलंबित करण्यात आले तसेच परिणामाला सामोरे जावे लागले, अशी माहिती असे एका वरिष्ठ पोलिस अधिकाऱ्याने पत्रकारांशी बोलताना दिली.

कळंगुट (Calangute) येथील प्राणघातक हल्ला प्रकरणातील चौघा संशयितांना 12 ऑक्टोबरपर्यंत पोलिस कोठडी बजावण्यात आली होती अशी माहिती कळंगुटचे पोलिस निरीक्षक नोलास्को रापोझ (Police Inspector Nolasco Raposo) यांनी दिली.

नाईकवाडा-कळंगुट येथे रात्री उशिरा सुरक्षा रक्षक स्वप्नील रेडकर (30, रा. तोर्डा-पर्वरी) याच्यावर जीवघेणा हल्ला करून गंभीर जखमी केल्याबद्दल पोलिसांनी संशयित टारझन पार्सेकर (नागोवा) सूर्यकांत कांबळी (ताळगाव) इमरान बेपारी (सांताक्रूझ) आणि सूरज शेट्ये (मेरशी) यांना अटक केली. हे सर्व संशयित हल्ला करून सिंधुदुर्गात पळून जाण्याच्या प्रयत्नात असताना कळंगुट तसेच पेडणे पोलिसांनी संयुक्तरित्या कारवाई करून त्यांना जेरबंद केले होते.

कळंगुट पोलिस तसेच नाईकवाडा येथील नागरिकांनी दिलेल्या माहितीनुसार, या भागात अनेक वर्षांपासून कार्यरत असलेले डिस्को क्लब चालविणाऱ्या स्थानिक व्यावसायिकांत मतभेद निर्माण झाल्याने एकमेकांचा वचपा काढण्यासाठीच या भागात सुरक्षा रक्षकाचे काम करणारा स्वप्नील रेडकर याच्यावर संशयितांनी जीवघेणा हल्ला केल्याचे सांगण्यात आले.