Goa Crime: चोरट्यांनी पोलिसांच्या हातावर दिली तुरी, स्टेशनच्या खिडकीतून काढला पळ

मडगाव: कन्हैयाकुमार मंडल याच्या खुनाला एक महिना झाला तरी खरा खुनी कोण याचा तपास लावण्यास अपयशी ठरलेल्या मायणा कुडतरी पोलिसांना आणखी एका नामुष्कीला सामोरे जावे लागले आहे.

एका भंगार अड्ड्यात चोरी केल्यामुळे अटक केलेल्या दोघा संशयितांनी या पोलिस स्थानकातून पोलिसांच्या हाती तुरी देऊन पळ काढला आहे. पोलिसांनी मात्र, असे घडलेच नाही,असा दावा करून कानावर हात ठेवले.

प्राप्त माहितीनुसार पळालेल्या चोरट्यांची नावे अनिल विश्वकर्मा आणि अनिल लमाणी अशी असून २० जुलै रोजी त्यांनी बोरी पुलाजवळच्या एका भंगार अड्ड्यातून तारेचे बंडल त्यांनी चोरून नेले होते. हे दोघेही अट्टल गुन्हेगार असून त्या दोघांची छबी या भंगार अड्ड्यातील सीसीटीव्ही कॅमेऱ्यात कैद झाल्यानंतर मायणा कुडतरी पोलिसांनी त्यांना अटकही केली होती.

मात्र, आज या चोरट्यांनी पोलिसांना गुंगारा देऊन खोलीच्या खिडकीचे ग्रील्स तोडून पलायन केले. पोलिस निरीक्षक अरुण गावस देसाई यांनी कानावर हात ठेवत, असे काही झालेच नाही, असे सांगितले.