Goa Accident: ढवळी येथे अपघातात दोन म्हशी ठार; साळगाव - कळंगुट रोडवरील अपघातात एक गंभीर जखमी

पणजी: गोव्यात अपघाताचे सत्र सुरुच आहे. शुक्रवारी राज्यात दोन अपघातांची नोंद झाली. ढवळी येथे झालेल्या अपघातात दोन म्हशी जागीच ठार झाल्या आहेत. तर, साळगाव - कळंगुट मार्गावर झालेल्या अपघातात एकजण गंभीर जखमी झाला आहे. दोन्ही अपघातात वाहनांचे मोठे नुकसान झाले आहे.

ढवळी येथे अपघातात दोन म्हशी ठार

ढवळी येथील बगल रस्त्यावर झालेल्या कारच्या अपघातात दोन म्हशींचा मृत्यू झाला आहे. अचानक धावत आलेल्या दोन म्हाशींना वेगाने आलेल्या कारने जोराची धडक दिली. ही धडक एवढी गंभीर होती की दोन्ही म्हशी जागीच ठार झाल्या. या अपघातात कारचे देखील मोठे नुकसान झाले आहे. गुरुवारी (०५ जून) रात्री हा अपघात झाला.

साळगाव - कळंगुट मार्गावर अपघात ; एक गंभीर जखमी

साळगाव - कळंगुट मार्गावर झालेल्या अपघातात ओमनीचा चालक गंभीर जखमी झाला आहे. स्टेट बँक ऑफ इंडियाच्या विरुद्ध दिशेला शुक्रवारी सकाळी साडे आठ ते नऊच्या सुमारास हा अपघात झाला. दोन्ही वाहनात पर्यटक असल्याची माहिती समोर आली आहे. रेन्टेड बलेनो आणि मारुती ओमनी यांच्यात हा अपघात झाला.

बलेनो कार मडगाव येथून कळंगुटच्या दिशेने जात होती. या कराचा वेग खूप होता. तर, ओमनी कळंगुटवरुन साळगावच्या दिशेने जात होती. यावेळी स्टेट बँक ऑफ इंडियाच्या विरुद्ध दिशेला दोन्ही कारचा मोठा अपघात झाला. ओमनीचा चालक गंभीर जखमी झाला असून, त्याच्यावर रुग्णालयात उपचार सुरु आहेत. साळगाव पोलिस प्रकरणाचा अधिक तपास करत आहेत.