मशाल मिरवणुकीत लोकप्रतिनिधींनी सहभागी व्हावे! तुये हॉस्पिटल कृती समितीचे आवाहन; अन्यथा आंदोलन तीव्र करण्याचा इशारा

मोरजी, ता. १४ (प्रतिनिधी): तुये हॉस्पिटलसंदर्भात सुरू असलेल्या आंदोलनाचा भाग म्हणून १५ रोजी सायंकाळी ५.३० वाजता आयटीआय ते तुये हॉस्पिटलपर्यंत मशाल मिरवणूक काढण्यात येणार आहे. या मिरवणुकीत तालुक्यातील दोन्ही आमदार, चारही जिल्हा पंचायत सदस्य, विविध पंचायतींचे सरपंच, उपसरपंच, पंच तसेच पालिका मंडळाच्या सदस्यांनी सहभागी व्हावे, असे आवाहन तुये हॉस्पिटल कृती समितीने केले आहे.

या पत्रकार परिषदेस समितीचे निमंत्रक झुजे लोबो, मांद्रेचे पंच बाळा उर्फ प्रशांत नाईक, जिल्हा पंचायत सदस्य रंगनाथ कळशावकर, माजी जिल्हा पंचायत सदस्य अरुण बानकर, जगन्नाथ पार्सेकर, व्यंकटेश नाईक, ॲड. सदानंद वायंगणकर, पार्सेचे माजी सरपंच देवेंद्र प्रभुदेसाई, मिशन फॉर लोकलचे राजन कोरगावकर, तुळशीदास राऊत, उल्हास नाईक, माजी सरपंच नीलेश कांदोळकर, सुनील नाईक आदी उपस्थित होते.

तुये हॉस्पिटल गोमेकॉला लिंक असावे, यासाठी मागच्या चार दिवसांपासून तुये हॉस्पिटल कृती समितीने साखळी उपोषण सुरू केले आहे. हे आंदोलन कुणा राजकीय पक्ष, सरकार, आमदार यांच्या विरोधात नाही. हा विषय सर्वसामान्य जनतेच्या आरोग्याशी निगडित आहे, त्यामुळे या आंदोलनात स्थानिक लोकप्रतिनिधींनी सहभागी होणे आवश्‍यक आहे, असे यावेळी सांगण्यात आले.

प्रशांत नाईक यांनी आमदार जीत आरोलकर यांनी शून्य तासात तुये हॉस्पिटलचा विषय आणि आंदोलनकर्त्याची भावना विधानसभेत मांडली. मात्र आरोग्यमंत्र्यांकडून समाधानकारक उत्तर मिळाले नाही, असे यावेळी सांगितले.