Goa: "अत्याधुनिक तंत्रज्ञानाचा वापर करून कृषी व्यवसायाकडे वळा"

डिचोली: शेती व्यावसायात अत्याधुनिक तंत्रज्ञानाव्दारे नवनवीन प्रयोग पुढे येत आहेत. शेती हे रोजगार तथा आर्थिक कमाईचे साधन बनले असून शेतकऱ्यांनी अत्याधुनिक तंत्रज्ञानाचा वापर करून कृषी व्यावसायाकडे वळावे. असे आवाहन डिचोलीचे आमदार तथा सभापती राजेश पाटणेकर यांनी केले आहे .

कृषी खात्याच्या 'आत्मा' प्रकल्पांतर्गत डिचोलीच्या विभागीय कृषी कार्यालयात आयोजित 'ग्राफ्टिंग पद्धती' विषयीच्या प्रशिक्षण कार्यशाळेचे उदघाटन केल्यानंतर सभापती पाटणेकर प्रमुख पाहूणे या नात्याने बोलत होते. यावेळी 'आत्मा'चे प्रकल्प संचालक किशोर भावे, विभागीय कृषी अधिकारी निलिमा गावस आदी उपस्थित होते.

उदघाटन सत्रानंतर 'ग्राफ्टिंग-व्यावसायाची संधी' या विषयावर उपस्थित शेतकऱ्यांना मार्गदर्शन करण्यात आले. डिचोली विभागीय कृषी कार्यालयाचे सहायक कृषी अधिकारी पंकज पोकळे आणि दीपक गडेकर यांनी ग्राफ्टिंग विषयी उपयुक्त माहिती दिली तसेच ग्राफ्टिंगव्दारे व्यावसायाच्या संधी कशा उपलब्ध होऊ शकतात. त्याविषयीही मोलाचे मार्गदर्शन करण्यात आले. कार्यशाळेत सहभागी शेतकऱ्यांना ग्राफ्टिंग करण्यासाठी लागणारे साहित्य (किट) देण्यात आले.

या कार्यक्रमात किशोर भावे यांनीही आपले विचार मांडले तसेच निलिमा गावस यांनी आलेल्या पाहुण्यांचे स्वागत केले. आत्माच्या तांत्रिक व्यवस्थापक अश्वेता पळ यांनी पाहुण्यांचा परिचय करून शेतकऱ्यांना मार्गदर्शन केले.