Goa Liberation War: गोव्याच्या मुक्ती लढ्याचा रंजक इतिहास नाटकातून उलगडणार...35 कलाकारांचा सहभाग

पद्माकर केळकर

गोव्याच्या मुक्ती लढ्यात सत्तरी तालुक्यातील असंख्य स्वातंत्र्य सैनिकांचे योगदान लाभलेले आहे. सत्तरी तालुक्यात धावे गावातून पोर्तुगीजांविरोधात पहिली क्रांतीकारी चळवळ सुरु झाली होती. त्या सर्व घटनेचा उलगडा नाटकातून दाखविणाचा प्रयत्न होणार आहे.

नगरगाव येथील शिक्षक संजीव बर्वे यांनी दोन अंकी 'तुळशीपत्र' या मराठी सत्यघटने वरील नाटकाचे लेखन केलेले आहे. या नाटकात बर्वे यांनी सत्तरी तालुक्यातील क्रांतीकारक स्वातंत्र्य सैनिक कोण कोण होते. त्याची माहीती नावे संकलन करुन त्याच स्वातंत्र्य सैनिकांची नावांची व्यक्तीरेखा कलाकारांना दिलेली आहे.

कला अकादमी गोवा आयोजित ५६ व्या अ गट मराठी नाट्य स्पर्धेत ब्रम्हाकरमळी विकास मंच सोशल क्लब यांच्या वतीने तुळशीपत्र नाटकाचे सादरीकरण शुक्रवार ८ डिसेंबर रोजी साखळी रविंद्र भवनात सायंकाळी ७ वाजता होणार आहे.

दिग्दर्शन कोमेडी नाट्य कलाकार म्हणून ओळख बनविलेले प्रविण मराठे करीत असून नाटकाची तालीम ब्रम्हाकरमळी ब्रम्हदेव देवस्थानात सुरु आहे. दिग्दर्शक प्रविण मराठेंनी बर्वेंनी लेखन केलेला अगदी क्रांतीकारी इतिहासाचा बारकाईने अभ्यास करुन कलाकारांना स्वातंत्र्य सैनिकांच्या रुपांनी घडविणाचा प्रयत्न होणार आहे.

नाटकात नगरगाव पंचायत क्षेत्रातील विविध गावातील तब्बल ३५ कलाकार असून पोर्तुगीज सरकारवेळी ग्रामीण भागातील लोकांचे रहाणीमान, संघर्ष रंगमंचाच्या माध्यमातून दाखविण्याचा प्रयत्न असेल.