डिचोली : खाणी सुरु करताना सरकारने अगोदर आमच्या ट्रकांचा विचार करून, आर्थिक संकटातून आम्हाला सावरावे. अशी मागणी डिचोलीतील ट्रकमालकांनी केली आहे. खाणबंदीचा आम्हाला मोठा फटका बसला असून, आर्थिक कमाईचे स्रोतच बंद झाल्याने आम्हाला अनेक कठीण समस्यांचा सामना करावा लागत आहे. अशी खंत उशीर झाला असला, तरी खाण लिजेस रद्द करण्याचा सरकारचा निर्णय स्वागतार्ह असल्याचे ट्रकमालकांचे म्हणणे आहे.
खाण लिजेस रद्द करण्याच्या सरकारच्या निर्णयानंतर आता खाणी सुरु होण्याचे संकेत मिळाल्याने खाण अवलंबितांमध्ये आशेचा किरण पसरला आहे. खनिज वाहतुकीशी संबंधित ट्रकवाल्यांच्याही आशा पल्लवीत झाल्या आहेत. कधी एकदा खाणी सुरु होतात आणि बंदावस्थेतील ट्रक रस्त्यावर उतरावयाला मिळतात. त्याची ट्रकवाल्यांना प्रतीक्षा आहे. सरकारने लवकरात लवकर खाणी सुरु कराव्यात. अशी मागणी ट्रकवाल्यांकडून करण्यात येत आहे.
डिचोलीसह पैरा, शिरगाव, मये आदी भागात मिळून 1 हजारहून अधिक ट्रक तालुक्यातील वेगवेगळ्या खाणींवर खनिजाची वाहतूक करीत होते. एका सेसा खाणीवर तर 300 हून अधिक ट्रक कार्यरत होते. मात्र खाणी बंद झाल्यापासून हे ट्रक धूळखात पडले आहेत. काही ट्रक गंजून गेले आहेत. तर काही ट्रकांवर वेली-झुडूपानी आक्रमण केले आहे. काही ट्रक पुन्हा रस्त्यावर धावण्याच्या लायकीचेही राहिलेले नाहीत.
काम नाहीच उलट खाणी सुरु होणार म्हणून बहूतेक ट्रकवाल्यांनी जवळपास असलेले पैसे खर्चून किंवा कर्ज काढून ट्रकांची दुरुस्ती केली आहे. मात्र कामच नसल्याने ट्रकवाले संकटात अडकले आहेत. त्यात ट्रकवाल्यांसमोर 'ग्रीन टॅक्स'चे संकट उभे ठाकले आहे. ट्रकांना काम नसल्याने ट्रकांची देखभाल कशी करायची आणि घरसंसार कसा चालवायचा, असा प्रश्न ट्रकवाले उपस्थित करीत आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
