शिरोड्यात झाडे घरांवर पडून, मोठे नुकसान

शिरोडा: जोरदार अवकाळी पाऊस आणि सोसाट्याचा वारा यामुळे तरवळे, काराय व शिरोडा भागातील झाडे घरांवर उन्‍मळून पडून सुमारे 25 लाखांचे नुकसान झाले. सुदैवाने प्राणहानी टळली.

काल रविवारी रोजी साडेदहाच्‍या सुमारास तरवळे, मैंगाळ, जुन्नट, काराय व शिरोड्याच्या अन्य भागात चक्रीवादळ झाले. यात तरवळे येथील प्रकाश नाईक यांच्या घरावर वडाचे झाड व माड पडून सुमारे 3 लाखांचे तर श्रीमती नाईक हिच्या घरावर फणसाचे झाड पडून 4 लाखांची हानी झाली. कृष्णानंद लोटलीकर यांच्या घरावर माड पडून मोठे नुकसान झाले. रत्नाकर नाईक यांच्या घरावर आंबा, फणसा झाडाच्या फांद्या पडून मोडतोड झाली. यात त्‍यांना 50 हजारांपेक्षा जास्त रुपयांचे नुकसान झाले. गीता गजा शिरोडकर, नामदेव शिरोडकर, सोनाळे येथील बस्त्यांव रॉड्रिगीस, काराय-शिरोडा येथील मिंगेल फर्नांडिस तसेच अन्‍य काही लोकांनाही या घटनेमुळे मोठा आर्थिक फटका बसला आहे.

दरम्‍यान, वीजखांबांवर झाडे उन्‍मळून पडल्‍याने काराय व शिरोडा भागात अंधार झाला. तरवळे भागातील माड, आंबा, फणसाची झाडे जमीनदोस्त झाली.

सुमारे 28 घरांची पडझड

या वादळामुळे शिरोडा आणि परिसरातील सुमारे 28 घरे उद्‌ध्वस्त होऊन लाखोंचे नुकसान झाले आहे, अशी माहिती सरपंच अमित शिरोडकर यांनी दिली. शिरोड्याचे आमदार तथा सहकारमंत्री सुभाष शिरोडकर यांनी नुकसानग्रस्‍तांना शासनामार्फत आर्थिक सहकार्य देण्‍यात येणार असल्‍याचे सांगितले. बोरी, लोटली, राय, पंचवाडी, बेतोडा, निरंकाल आदी गावांनाही वादळाचा मोठा फटका बसला असून आंबा, काजू पिकांचीही नासाडी झाली आहे.