कार चालवायला शिकत असतानाच एका महिलेवर काळाने घाला घातला. सांगेत कार चालवण्याचं प्रशिक्षण घेत असताना अचानक झाड कोसळल्याने महिलेचा जागीच मृत्यू झाला आहे. सांगे पोलिस स्टेशनजवळच हा अपघात झाला. कारचालक महिलेला गाडी शिकवणाऱ्या प्रशिक्षकाला गंभीर जखमी अवस्थेत दक्षिण गोवा जिल्हा रुग्णालयात दाखल करण्यात आलं आहे.
अनिता फर्नांडिस असं या अपघातामध्ये मृत्यू झालेल्या महिलेचं नाव आहे. तर जखमी प्रशिक्षक चालकाचं नाव नासिर शेख असल्याची माहिती आहे. हल्लीच अनिता यांनी कार चालवायला शिकण्यासाठी बालाजी ड्रायव्हिंग स्कूलमध्ये नोंदणी केली होती. नेहमीप्रमाणे आज सकाळीही कार चालवायचं प्रशिक्षण घेत असताना कार सांगे पोलिस स्टेशनजवळ आल्यानंतर अचानक एक भलंमोठं झाड कारवर कोसळलं.
झाड कारवर कोसळल्यानंतर परिसरात एकच गोंधळ उडाला. काही कळायच्या आतच होत्याचं नव्हतं झालं आणि अनिता यांचा मृत्यू झाला. तर कार चालवायचं प्रशिक्षण देणाऱ्या नासिर शेख यांना गंभीर इजा झाली. तातडीने त्यांना रुग्णवाहिका बोलावून दक्षिण गोवा जिल्हा रुग्णालयात दाखल करण्यात आलं.
दरम्यान हे झाड कशामुळे कोसळलं याची माहिती अद्याप मिळू शकली नाही. मात्र झाड कोसळल्यामुळे एका महिलेला आपला जीव गमावावा लागला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.