Tree Collapses At Buimpal: गुलमोहराचे झाड पडून वाहतूक कोंडी; वीज वाहिनीचे नुकसान

वाळपई: भुईपाल सत्तरी येथे मुख्य रस्त्यावर आज दुपारी १.३० च्या सुमारास गुलमोहराचे झाड पडल्याने वाहतूक कोंडी झाली. तसेच मुख्य वीज वाहिनीचे नुकसान होऊन काही काळ वीज पुरवठा खंडित झाला होता.

गेल्या कित्येक दिवसापासून जोरदार वारे व पावसामुळे अनेक झाडांची पडझड सुरु आहे. त्यात आज सोमवारी दुपारी रस्त्याच्या बाजूला असलेले गुलमोहराचे एका बाजूचे झाड मोडून मुख्य रस्त्यावर पडले. झाड पडले त्यावेळी कोणतेही वाहन नसल्याने मोठा अनर्थ टळला.

मात्र यावेळी वीज वाहिनीचे मोठे नुकसान झाले. यावेळी तातडीने वाळपई अग्निशमन दलाच्या जवानांनी घटनास्थळी दाखल होऊन रस्त्यावर झाड बाजूला करुन वाहतूक सुरळीत केली व त्यानंतर रस्ता वाहतुकीसाठी खुला करण्यात आला.

वाळपई रेडेघाड तसेच इतर रस्त्याच्या बाजुला मोठ्या प्रमाणात धोकादायक झाडे असून कोणत्याही वेळी कोसळण्याची भीती आहे. या झाडांची पाहणी करुन धोकादायक झाडे हटवावीत, अशी मागणी होत आहे.