Goa News: खैरीच्या झाडांची तस्करी; एकाला धारबांदोडात अटक

Goa News: ओकांब - धारबांदोडा येथे खैरीच्या झाडांच्या तस्करीप्रकरणी वन खात्याने दोडामार्ग येथील एकाला ताब्यात घेतले आहे. गुरुवारी ही कारवाई करण्यात आली.

ओकांब येथील सात खैरीच्या झाडांची कत्तल केल्याची तक्रार मिळाल्यावर वन खात्याने याप्रकरणी शोध मोहीम राबवली असता, दोडामार्ग येथील नारायण बाबू खरवत हा तोडलेल्या खैरीच्या झाडांसह सापडला.

संशयित तोडलेली खैरीची झाडे दोडामार्ग भागात नेण्याच्या प्रयत्नात होता. यावेळी त्याचा एक साथीदार मात्र पलायन करण्यात यशस्वी ठरला.

तोडलेल्या खैरीच्या झाडांची किंमत साधारण पंचवीस हजार रुपये असल्याचे सांगण्यात आले. वन खात्याच्या अधिकाऱ्यांनी आपल्या कर्मचाऱ्यांसह ही कारवाई केली. खैरीच्या झाडांचा उपयोग विड्याच्या पानासाठी कात तयार करण्यासाठी केला जात असल्याचे सांगण्यात आले.