St. Francis Xavier Exposition: शवप्रदर्शनासाठी यात्रेकरूंना शटल बससेवा, ४६ दिवसांचा वाहतूक आराखडा तयार; केवळ मुख्यमंत्र्यांची संमती बाकी

Traffic Plan For Old Goa Exposition by Transport Department

जुने गोवे: नोव्हेंबर महिन्यात गोव्यात सेंट फ्रान्सिस झेवियर यांचा शवप्रदर्शनाचा सोहळा पार पडणार आहे. २१ नोव्हेंबर पासून सुरु होणारा हा सोहळा तब्बल ४६ दिवसांसाठी चालेल आणि दरम्यान येणाऱ्या देश-विदेशातील भाविकांसाठी परिवहन संचालनालयाकडून वाहतूक योजनेची आखणी करण्यात आलीये.

नोव्हेंबर आणि डिसेंबर महिन्यातील या ४६ दिवसांत जुन्या गोव्यातील वाहतूक आटोक्यात राहावी तसेच यात्रेकरूंची गोवा भेट सुव्यवस्थित व्हावी म्हणून हा निर्णय घेण्यात आला आहे.

परिवहन मंडळाच्या आराखड्यानुसार फोंडा आणि मडगाव येथून एक्सपोजीशनच्या शटल बसेसचा वापर करणाऱ्या यात्रेकरू माजी आमदार पांडुरंग मडकईकर यांच्या घराजवळ उतरतील आणि इथून त्यांना दोन मुख्य गंतव्यस्थानांकडे निर्देशित केले जाईल, पैकी एक आहे एला फार्म आणि दुसरे आहे पिंटो गॅरेज.

पिंटो गॅरेज मार्गे जाणारी बसेस जुन्या गोव्यातील पंचायत घराजवळ एक थांब घेतील. हा आराखडा सध्या अंतिम टप्यात असून मुख्यमंत्र्यांकडून याचा आढावा घेतला जातोय.

शवप्रदर्शनाच्यावेळी खासगी वाहनाच्या वापरावर निर्बंध असल्याने खासगी वाहन चालकांना गाडी पार्क करण्यासाठी ठराविक जागा देण्यात आल्या आहेत आणि इथून पुढे चर्चसाठी ते शटल बसचा वापर करू शकतात. खासगी वाहनांवर निर्बंध लावल्याने चर्च जवळील वाहतूक आटोक्यात राहायला मदत मिळेल असे अधिकाऱ्यांचे म्हणणे आहे.

डेम्पो शिपयार्डजवळील बचिया प्रॉपर्टी, ओल्ड गोवा एज्युकेशन सोसायटी शाळेचे मैदान आणि माँटफोर्ड ग्राउंड या तीन जागा पूर्वी खासगी गाड्यांच्या पार्किंगसाठी आखून देण्यात आल्या होत्या ज्यात आता हेलिपॅडची जागा देखील जोडण्यात आली आहे. हेलिपॅडवरून यात्रेकरूंना घेऊन जाणाऱ्या बसेस जुने गोवा पेट्रोल पंपाच्या दिशने जातील आणि पांडुरंग मडकईकर यांच्या घराजवळून चर्चच्या दिशेने वळतील.