Smart City Panaji: स्मार्ट सिटी पणजीची सुरक्षा होमगार्ड्सच्या हाती, ऐन पर्यटन हंगामात वाहतूक पोलिस गायब

पणजी: शहरातील वाहतूक व्यवस्था सध्या होमगार्डच्या भरोसे असल्याचे दिसत आहे. कारण वाहतूक नियंत्रण शाखेचे पोलिस केवळ मोजक्याच ठिकाणी नजरेस पडत आहेत. सध्या वाहतूक कोंडीचे प्रकार वारंवार घडत असतानाच मेरशी चौकातील आर्टिफिशियल इंटेलिजन्स (एआय) सिग्नल यंत्रणेचा बोजवारा उडाला आहे. त्यातच चौकातील पथदिवेही बंद पडल्याने शहराची रया गेली आहे.

एका बाजूला शहराच्या अर्ध्या भागात ‘स्मार्ट सिटी मिशन’अंतर्गत खोदकाम सुरू आहे. त्यामुळे वाहतूक एका बाजूने सुरू आहे, तर दुसऱ्या बाजूला शहरातील महत्त्वाच्या ठिकाणी वाहतूक पोलिसांऐवजी होमगार्डच्या भरंवशावर वाहतूक व्यवस्था हाताळली जात आहे. चर्च स्क्वेअर या महत्त्वाच्या ठिकाणी किंवा सांतिनेज चौकात वाहतूक पोलिसांची गरज असताना तेथे होमगार्ड तैनात केले आहेत.

सध्या सरत्या वर्षाला निरोप देण्यासाठी गोव्यात पर्यटक मोठ्या संख्येने दाखल होत आहेत. शहरात वाहन पार्किंगचा प्रश्न ऐरणीवर आहे. दिवजा सर्कलकडे पोलिस असतानाही अधून-मधून होमगार्डना वाहतूक नियमनाचे काम करावे लागत आहे.

पथदिवे बंद; अंधाराचे साम्राज्य

मेरशी चौकात उभारलेली आर्टिफिशियल इंटेलिजन्स वाहतूक यंत्रणा कित्येक महिन्यांपासून बंद आहे. तेथील कॅमेरे लटकत्या अवस्थेत आहेत. त्यामुळे पोलिसांनाच वाहतूक नियमन करावे लागत आहे. येथील मडगावकडून येणाऱ्या व जाणाऱ्या मार्गावरील पथदीप बंद आहेत. सिग्नल यंत्रणेशेजारील पथदीपही बंद असल्याने या परिसरात अंधाराचे साम्राज्य आहे.

दुहेरी पार्किंग; वाहतूक कोंडी

शहरात पार्किंग केलेल्या वाहनांच्या मागे चारचाकी वाहने उभी करण्याचा प्रकार सध्या सुरू आहे. त्यामुळे एकेरी वाहतुकीलाही अडथळा निर्माण होत आहे. १८ जून मार्गावर सायंकाळी पाचनंतर नेहमीच वाहतूक कोंडी होते. चारचाकी वाहने संथगतीने हाकली जातात. मेरी इमॅक्युलेट चर्चच्या डाव्या बाजूने मळ्याकडे जाणाऱ्या मार्गावर आयकर खात्याच्या बाजूला वाहने उभी केली जात असल्याने वाहतुकीला अडथळा निर्माण होत आहे. त्यामुळे चर्चच्या डाव्या बाजूच्या रस्त्यावर सध्या वाहतूक कोंडी पाहायला मिळते.