कोकण रेल्वे मार्गावरील पेडणे बोगद्यातील रुळांवर चिखलमिश्रित पाणी आल्याने वाहतूक साडेसात तास बंद पडली होती. दुपारी ३ वाजता हा मार्ग बंद झाला होता. रात्री १०.३० वाजता वेरावल एक्सप्रेस पेडणे रेल्वे स्थानकापासून सावंतवाडीच्या दिशेने रवाना झाली, अशी माहिती कोकण रेल्वेचे उपसरव्यवस्थापक (जनसंपर्क) बबन घाटगे यांनी आज रात्री ‘गोमन्तक’ला दिली.
पेडणे रेल्वे स्थानकापासून अवघ्या काही मीटरवर असलेल्या बोगद्याने आज पुन्हा कोकण रेल्वेची वाहतूक खंडित केली. याच बोगद्यातील ढासळती माती व झिरपणारे पाणी यांमुळे कोकण रेल्वेचे गोव्यातील आगमन १९९७ मध्ये एक वर्ष लांबणीवर पडले होते.
या बोगद्यातून महाराष्ट्राकडे जाताना रेल्वे रुळांच्या उजवीकडे मोठा झरा गेले दोन दिवस पडणाऱ्या पावसामुळे उमळला आहे. चिखलमिश्रित पाणी रूळावर आल्याने रेल्वेची वाहतूक दुपारी खंडित करण्यात आली.
सायंकाळच्या वेळेत कार्यालयीन कामासाठी गोव्यात पोचलेले कोकण रेल्वेचे अध्यक्ष व व्यवस्थापकीय संचालक संतोषकुमार झा हे तातडीने घटनास्थळी दाखल झाले. विभागीय रेल्वे व्यवस्थापक बाळासाहेब निकम हेही कारवारहून गोव्यात पोचले. कामगारांकरवी चिखल उपसून व पाण्याला वाट करून देण्याचा प्रयत्न सुरू होता.
झा यांनी रात्री ९ वाजता ‘गोमन्तक’ला सांगितले की, पाण्याला वाट करून दिली जात आहे. त्यामुळे ते रुळावर येणार नाही. चिखल हटविण्यात येत आहे. पाण्याची पातळी कमी झाली की, रेल्वे वाहतूक सुरू करण्याचा आमचा प्रयत्न आहे.
या आपत्तीमुळे लोकमान्य टिळक टर्मिनस कोचुवेली एक्सप्रेस रोहा येथे, नेत्रावती एक्सप्रेस चिपळूण, मंगला कणकवली, ऋषिकेश कोचुवेली एक्सप्रेस कुडाळ, जनशताब्दी सावंतवाडी येथे थांबवण्यात आली होती. मडगावहून मुंबईला सायंकाळी सहा वाजता निघणारी कोकण कन्या एक्सप्रेस रात्री १०.३० पर्यंत मडगावातून सुटू शकली नव्हती.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.