कार्निवलमध्ये स्टॉल्सवर विविध वस्तूंची रेलचेल, पर्यटकांची तुफान गर्दी

Goa Carnival 2022: आज गोव्यात पणजीमधून (Panajim) 'विवा कार्निवल 2022'ची सुरुवात झाली. किंग मोमोने खा..प्या आणि मजा करा..!, असा संदेश देत कार्निवलची मजा लुटण्याचे सर्वांना आवाहन केले. (Tourists thronged the carnival)

मीरामार बीचवरील स्टॉल्सवर विविध वस्तूंची रेलचेल...

मीरामार (Miramar) बीचवर खाद्यपदार्थांचे आणि विविध वस्तूंचे स्टॉल पहायला मिळाले. या स्टॉल्सवर चमचमीत पदार्थ, कपडे, दागिने, फुलझाडे, घरगुती लोणचे, खाऊ त्याचबरोबर शोभेच्या वस्तू आणि गृहोपयोगी वस्तू पाहायला मिळाल्या. सांबा स्केअरप्रमाणेच मिरामार बीचवरील स्टॉल्सवरही पर्यटकांनी गर्दी केली होती.

सांबा स्केअर परिसरात पर्यटकांची गर्दी...

सांबा स्क्वेअर परिसर हा फेस्टिवलचा एक महत्त्वाचा भाग आहे. कार्निवलची सुरुवात झाल्यानंतर सांबा स्क्वेअरवर पर्यटकांची अलोट गर्दी पाहायला मिळाली. कर्णकर्कश्श संगीतात हजारो पर्यटक आनंद कार्निव्हलचा आनंद लुटण्यासाठी उपस्थित होते. लहान मुलांपासून ते वयोवृद्धांपर्यंत सर्वांनीच तिथे प्रचंड गर्दी केली होती. अगदी उभे राहायला जागा नसूनही नव्याने लोक तिथे येतच होते.

दरम्यान, वेगवेगळ्या सामाजिक विषयांवर आधारित चित्ररथ आज पहायला मिळाले. पर्यावरण, आरोग्य गोव्याची कला-संस्कृती, खाद्यसंस्कृती, निसर्ग अशा सर्वच विषयांवर आधारित हे चित्ररथ होते. पर्यावरण जतन करण्याचा संदेश देत, गोव्याची कला संस्कृती सादर करत, पारंपरिक संगीत आणि नृत्य सादर करत, त्याचबरोबर आरोग्याबाबत जनजागृती करत हे चित्ररथ पुढे जात होते. फक्त राज्यातलेच नव्हे तर देशभरातले आणि परदेशातले पर्यटक कार्निवलचा आनंद लुटत होते.

खरं तर मागील दोन वर्षांमध्ये कोरोनामुळे कार्निवलवर विरजण पडले होते. पण यंदा रुग्णसंख्या ओसरल्यामुळे धुमधडाक्यात फेस्टिवलची सुरुवात या वर्षी करण्यात आली आहे. यामुळे राज्यात नव्याने चैतन्याचे वातावरण निर्माण झाले आहे.