Goa Tourism: किनारी पर्यटनाची वेगळ्या अर्थाने ओळख करून देणार पर्यटन मंत्री रोहन खंवटे

Goa Tourism: राज्यात जी-20 परिषदेच्या बैठका पार पडल्यानंतर जग कसे पुढे चालले आहे आणि गोव्याला कोणत्या दिशेने जायचे आहे, याचा विचार पुढे आला. त्यातूनच ‘ग्रीन टुरिझम’ विकसित करण्यावर भर देण्याचे निश्‍चित झाले. आत्तापर्यंत ओळख असलेल्या किनारी पर्यटनाची गोव्याची ओळख वेगळ्या अर्थाने करून देण्याचा आपला प्रयत्न राहणार असल्याचे पर्यटन मंत्री रोहन खंवटे यांनी सांगितले.

जागतिक पर्यटन दिनाच्या निमित्ताने ‘एडीटर्स टेक'' या ‘गोमन्तक टीव्ही’वरील कार्यक्रमासाठी संपादक-संचालक राजू नायक यांनी मंत्री खंवटे यांची मुलाखत घेतली. ते पुढे म्हणाले, राज्य सरकारने कितीही हरित पर्यटन म्हणून चालत नाहीत, तर ते सर्वजणांनी अंमलात आणायला हवे.

पंचतारांकित काही हॉटेल्सनी हरित पर्यटनाची अंमलबजावणी केली आहे, त्यात त्यांनी प्लास्टिक बाटली, टूथ ब्रश सारख्या वस्तू वापरणे बंद केले आहे. त्याठिकाणी आता तुम्हा बाबूंचा ब्रश, बांबूचे कंगवे नजरेस पडतील. ताज सारख्या हॉटेलनीही ही पद्धत अवलंबली आहे. केवळ पंचतारांकित हॉटेलनेच ग्रीन टुरिझमची कल्पना राबवायला सुरुवात केली आहे. पुढील पिढीसाठी कार्बनमुक्त वातावरण असावे, असा यामागील उद्देश आहे.

पर्यावरण राखून पर्यटन करू शकलो, तरच पुढच्या पिढीला लाभ होईल, असे सांगत खंवटे म्हणाले, स्वयंपोषक विकास साधत असताना त्याच्याशी निगडित घटकांनाही त्याची जबाबदारी पेलणे गरजेचे आहे.

अधिक खर्च करणारे आणि उच्च दर्जाचे पर्यटक गोव्यात आणण्यासाठी आपले प्रयत्न असल्याचेही खंवटे यांनी नमूद केले. पर्यटन खात्याच्या काही धोरणाला विरोध करणाऱ्या प्रवृत्तींवरही खंवटे यांनी टीका केली. काही लोक अशा विरोधात राजकारण करीत असल्याचे त्यांनी नमूद केले.

आखाती देशात थेट विमानसेवेसाठी प्रयत्न !

आम्ही पायाभूत सुविधा निर्माण करताना पर्यावरणपूरक वस्तूंचा वापर करतो,असे पर्यटनमंत्री रोहन खंवटे यांनी सांगितले. जागतिक स्तरावर गोव्यातील पर्यटनाची ओळख निर्माण करण्यासाठी ग्रामीण भागातील पर्यटनावर भर दिला आहे. त्याठिकाणी निर्माण होणाऱ्या सुविधा पाहता तेथे मर्यादित पर्यटक येतील, हेही पाहिले जाईल. त्यासाठी आखाती देशातून पर्यटक गोव्यात आणण्यासाठी थेट विमानसेवा सुरू करण्याकरिता आम्ही नागरी विमान वाहतूक मंत्र्यांकडे त्याविषयी चर्चाही केली आहे,असेही त्यांनी सांगितले.