Goa Crime: जेसीबी चोरीप्रकरणी तिघांना अटक

जेसीबी मशिन चोरीप्रकरणी कोलवळ पोलिसांनी आज तिघांना अटक केलीय. या प्रकरणी सविस्तर माहिती अशी की, यमनूर कडकल यांच्या मालकीचे जेसीबी मशीन माडेल हाऊसिंग बोर्ड येथून अज्ञात व्यक्तींनी चोरून नेले होते. या संबंधी एसडीपीओ म्हापसा जिवबा दळवी यांच्याकडे या प्रकरणाविषयी भादंवि कलम 379 अन्वये एफआयआर नोंदविण्यात आला होता.

या प्रकरणाचा शोध घेण्याकरिता स्थानिक गुप्तचर टीम तैनात आली होती. त्यानुसार रवी धीरप्पा चव्हाण, (रा. साई कॉलनी- माडेल), रवी धकप्पा राठोड (रा. साई कॉलनी, माडेल) आणि प्रकाश सोमू राठोड (सर्व मूळचे कर्नाटकातील रहिवासी ) या संशयितांना पोलिसांनी ताब्यात घेतले.

कसून चौकशी केल्यानंतर त्यांनी ओव्हर-राइडिंग इग्निशन सिस्टीमद्वारे या जेसीबी मशीनची चोरी केल्याचे कबूल केले. या कृत्यासंदर्भात त्या आरोपींना अटक करून 03 दिवसांची पोलीस कोठडी सुनावण्यात आली आहे.

या प्रकरणी S.P. यांच्या देखरेखीखाली संपूर्ण तपास करण्यात आला. शिवेंदू भूषण, आयपीएस, एसडीपीओ म्हापसा जिवबा दळवी, पीआय कोलवाळ, PSI कुणाल नाईक, HC- 5777 पांडुरंग नाईक, PC-6340 सुलेश नाईक यांनी या तपास कामात सक्रिय सहभाग घेतला असून पुढील तपास सुरू आहे.