कोरोनाच्या तिसऱ्या लाटेमुळे गोव्यातील जीएसटी संकलनावर परिणाम

पणजी: कोविड-19 च्या तिसर्‍या लाटेमुळे गोव्याला आर्थिक फटका बसला. परिणामी राज्याच्या वस्तू आणि सेवा कर (जीएसटी) संकलनात फेब्रुवारी महिन्यात 6% ची माफक वाढ नोंदवली गेली, असे सरकारने मंगळवारी जाहीर केले.

फेब्रुवारीतील राज्याचा एसटी महसूल 364 कोटी आहे. फेब्रुवारीच्या पहिल्या आठवड्यात कोरोनाची (COVID-19) तिसरी लाट ओसरण्यास सुरुवात झाली. मात्र, तोपर्यंत राज्यातील व्यावसायिकांचे मोठ्या प्रमाणात आर्थिक नुकसान झाले होते. कोरोनाकाळात हॉटेल्स (Hotel), बार, रेस्टॉरंट्स, स्पा, कॅसिनो यांच्यावर 50% आसन क्षमतेचे निर्बंध लादण्यात आले.

डिसेंबर 2021 मध्ये तेजीत सुरू असलेल्या पर्यटनाला तिसऱ्या लाटेमुळे मोठा फटका बसला. हॉटेल्सची बुकिंग रद्द झाली, फ्लाइटचे आगमन कमी झाले आणि अनेक कार्यक्रम रद्द करण्यात आले. याचा थेट परिणाम जीएसटी (GST) संकलनावर झाला, ” असे सरकारी अधिकाऱ्यांनी सांगितले. राज्यात येणाऱ्या पर्यटकांमध्ये वाढ होत आहे. परिणामी मार्च महिन्याच्या जीएसटी संकलनात वाढ होईल, असा कर अधिकाऱ्यांचा अंदाज आहे.