Fish Price Hike In Goa: मासळी दर सामान्यांच्या आवाक्याबाहेरच!

Fish Price Hike In Goa: राज्यात मासळीच्या दरात वाढ झाली असून इसवण सातशे ते आठशे, तर पापलेट हजार रुपये किलो झाला आहे.

मासळीची आवक घटल्याने तसेच काही राज्यात सण आणि जत्रोत्सवांमुळे मासांहारात घट झाल्याने अनेक विक्रेते अल्प प्रमाणात मासळी बाजारात आणत असल्याने दरात वाढ झाली आहे.

आठवड्यात दीडशे रुपये किलो दराने मिळणारे बांगडे आता 200 रुपये किलो, बांगड्याचा दरही म्हणजे सर्वसामान्यांना परवडेनासा झाला आहे.

इसवण आठशे, तर पापलेट १ हजार रुपये किलो दराने विकला जात आहे. लेपो २५० -३०० रुपये, सुंगटे (कोळंबी) आकाराप्रमाणे ३०० ते ५०० रुपयांनी विकली जात आहेत. तारली देखील १५० ते २०० रुपये किलो दराने विकली जात आहेत.

पणजी मासळी बाजारात इसवण, कर्ली, लेपो, माणकी, खुबे, कोळंबी, समुद्री खेकडे आदी विविध प्रकारची मासळी मुबलक प्रमाणात विक्रीस उपलब्ध होती. मासळी खरेदीसाठी ग्राहकांची वर्दळ अधिक होती.

काही मासळी विक्रेते किलोच्या दरात विकत होते; तर काहीजण वाट्याच्या दराने विकत होते. वाट्याच्या दराने लहान बांगडे १५० रुपयांना ८ ते १० या दराने उपलब्ध होते.

हॉटेलात दरवाढ ?

1. मासळीचे हुमण, फिश फ्रायचा आस्वाद चाखण्यासाठी अनेक खवय्ये तसेच पर्यटक गोव्यात येतात. मात्र, वाढत्या मासळीच्या दरामुळे मासळी प्लेटच्या दरात वाढ होण्याची शक्यता नाकारता येत नाही.

2. कोणाला तळलेली मासळी आवडते, तर कोणाला हुमणातली, कुणाला इसवणाची पोस्ता आवडतात, तर कुणाला प्रॉन्स फ्राय. मात्र, काहींना तर दररोजच्या जेवणात मासळी लागतेच लागते.

3. अशावेळी मध्यमवर्गीयांना देखील ताज्या मासळी व्यतिरिक्त सुक्या खाऱ्या बांगड्यांवर दिवस ढकलावे लागत आहेत. येणाऱ्या काळात मासळीचा तुटवडा जाणवल्यास दरात वाढ होण्याची शक्यता नाकारता येत नाही.