तेल समजून ओतले पेट्रोल; पणती लावताना झाला भडका अन् महिला होरपळली

Aldona Fire News: हळदोण्यातील रामतळे येथे सोमवारी साईबाबांची पालखी घरोघरी जात असताना दिक्षिता नाईक या 32 वर्षीय महिलेसोबत एक अपघात घडला. पालखीसाठी पणत्या पेटवत असताना भडका होऊन विवाहिता जखमी झाली आहे.

उपलब्ध माहितीनुसार, 32 वर्षीय दिक्षिता नाईक या पणत्या पेटवत होत्या. तेव्हा त्यांनी त्यामध्ये तेलाऐवजी चुकून पेट्रोल ओतले. खरेतर ही पेट्रोलची बॉटल नवऱ्याने आणून ठेवली. त्यावेळी दिक्षिता यांनी ते तेल समजून पणत्यांमध्ये ओतण्यास सुरुवात केली.

यावेळी पेट्रोलचा भडका झाला आणि त्यांच्या हातात असलेली पेट्रोलची बॉटल त्यांच्या अंगावर उसळली. यामध्ये त्या गंभीररित्या जखमी झाल्या. हा सर्व प्रकार घडताच आजूबाजूच्या लोकांनी आणि त्यांच्या नवऱ्याने त्यांना त्वरित गोवा मेडिकल कॉलेजमध्ये दाखल केले.

त्यानंतर डॉक्टरांनी दिलेल्या माहितीनुसार त्या 70 टक्के भाजल्या आहेत. या घटनेने सर्वत्र हळहळ व्यक्त होत आहे.