नाताळ अन् मावळत्या वर्षाला निरोप देण्यासाठी पर्यटक गोव्यात दाखल; रहदारीचा वाढला ताण

वास्को: नाताळ सण आणि मावळत्या वर्षाला निरोप देण्यासाठी पर्यटकांचा ओघ गोव्यात वाढत असून रहदारीचा ताण वाढला आहे. कुठ्ठाळी झुआरी पुलावर वाहतूक रहदारीमुळे चक्का जाम होत असल्याने वाहतूक पोलिसांबरोबर (Police) लोकांची डोके दुखी वाढली आहे. कुठ्ठाळी येथील दुसऱ्या झुआरी पुलाचे काम सुरू असल्यामुळे वाहतुकीची कोंडी होत आहे.

गेल्या आठवड्यापासून वाहतुकीच्या कोंडीचे प्रमाण बरेच वाढले असून वाहने रांगेत उभी करून ठेवावी लागत आहेत. यामुळे वाहन चालक त्रस्त झाले आहेत. कुठ्ठाळी भागात झुआरी पुलाचे काम सुरू असल्यामुळे सकाळी 9 ते 11 वाजेपर्यंत वाहतुकीची कोंडी होते. दुपारी 1 ते 3 वाजेपर्यंत वाहतुकीची कोंडी होते. नंतर संध्याकाळी 6 ते रात्री 2 वाजेपर्यंत वाहचुकीची कोंडी होते. या वाहतुकीच्या कोंडीमुळे कुठ्ठाळीतील झुआरी पुलापासून पणजीच्या दिशेने आगशी ते गोवा वेल्हापर्यंत वाहनांच्या मोठ्या रांगा लागलेल्या असतात.

तर मडगावच्या दिशेने जाताना कुठ्ठाळीच्या पुलापासून ठाणे-कुठ्ठाळी ते वेर्णा औद्योगिक वसाहतीपर्यंत वाहनांच्या दुतर्फा मोठ्या रांगा लागलेल्या असतात. यावेळेत मडगावहून कुठ्ठाळी मार्गे पणजीला येणे, ही लोकांना डोकेदखी ठरते. धूळ प्रदूषणाचाही वाहन चालकांना जास्त त्रास होतो. या मार्गावर बरेच वाहन चालक पुढे जाण्याचा प्रयत्न करीत असल्यामुळे वाहनांच्या दुप्पट रांगा लागत असतात. यामुळे वाहतुकीची कोंडी होऊन सर्वांना डोकेदुखी ठरते.

कुठ्ठाळीत वाहतुकीववर नियंत्रण ठेवण्यासाठी वाहतूक पोलिस तैनात असले, तरी वाढत्या वाहनांच्या संख्येमळे तसेच वाहतुकीच्या नियमांचे उल्लंघन करणाऱ्या वाहन चालकांमुळे पोलिसांना वाहतुकीवर नियंत्रण ठेवणे कठीण होते.वेर्णातील औद्योगिक वसाहतीतील कारखान्यात कामाला जाणारे लोक सकाळी 8 वाजल्यापासून पणजी मडगाव मार्गावरून प्रवास करीत असतात. दुपारी व संध्याकाळी त्यांच्या दुसऱ्या शिफ्टला सुरूवात होते. औद्योगिक वसाहतीत काम करणारे कामगारांची गर्दी या वाहतुकीच्या कोंडीचे अन्य एक कारण आहे.