Goa Mining Case: डिचोली-लाटंबार्सेत चिरेखाणीवर छापा

Goa Mining Case: डिचोली तालुक्यातील लाटंबार्से येथे एका बेकायदा चिरेखाणीवर भरारी पथकाने छापा टाकून चिरे काढण्याखाणी वापरण्यात येणारी यंत्रसामग्री जप्त केली. डिचोलीचे मामलेदार राजाराम परब यांच्या नेतृत्वाखालील भरारी पथकाने पोलिसांच्या उपस्थितीत आज (शुक्रवारी) सायंकाळी ही कारवाई केली.

या कारवाईवेळी खाण आणि भूगर्भ खात्याचे सहायक भूगर्भतज्ज्ञ नितीन आरोस्कर, तलाठी फटगो गावकर आणि राजेंद्र नाईक यांचा सहभाग होता.

भरारी पथकाने अचानक धाड टाकली, तेव्हा लाटंबार्से येथील सर्व्हे नं-६५५/० या जमिनीत बेकायदा चिरेखाण चालत असल्याचे आढळून आले.

या छाप्यावेळी भरारी पथकाने चिरे काढण्यासाठी वापरण्यात येणारा कटरसह पॉवर टिलर, एक जनरेटर आदी यंत्रसामग्री जप्त केली. जप्त केलेली यंत्रसामग्री डिचोली पोलिसांच्या ताब्यात देण्यात आली आहे. महिन्यापूर्वी पोलिसांनी मये येथे एका चिरेखाणीवर धाड घालून चारजणांना अटक करुन यंत्रसामग्री जप्त केली होती. आता लाटंबार्से येथील कारवाईमुळे बेकायदा चिरेखाण व्यवसायात असलेल्यांचे धाबे दणाणले आहेत.