Gauri Achari Murder Case: गौरीच्या खुनातील संशयिताला जामिन नाहीच! पणजी कोर्टाने फेटाळला अर्ज

Gauri Achari Murder Case: सन 2022 मध्ये ओल्ड गोव्यात घडलेल्या प्राध्यापक गौरी आचारी खून प्रकरणात पणजी सत्र न्यायालयाने मंगळवारी संशयित आरोपी गौरव बिद्रे याचा जामिन अर्ज फेटाळला. त्यामुळे त्याला तुरूंगातच राहावे लागणार आहे.

गौरी खांडोळा महाविद्यालयात प्राध्यापक म्हणून कार्यरत होती. तिचा गळा आवळून खून करण्यात आला होता. कदंब पठारावरील झाडीत तिचा मृतदेह टाकून देण्यात आला होता. जुने गोवेचे तत्कालिन पोलिस निरीक्षक दिनेश गडेकर यांनी या प्रकरणाताच तपास करत संशयित गौरव बिद्रे याला 24 तासात अटक केली होती.

त्यानेही खुनाची कबुली दिली होती. घटनेपूर्वी गौरवला गौरी हिच्यासोबत जुने गोवे येथील प्राईम रोज इमारतीजवळ पाहिलेल्यांच्या साक्षी पोलिसांनी नोंदवल्या आहेत. काही महिन्यांपुर्वी गौरव बिद्रे याला कोलवाळ कारागृहातील कैद्यांनी मारहाण केली होती.

या प्रकरणी न्यायालयाने तुरूंगाधिकाऱ्यांना उत्तर सादर करण्यास सांगितले होते. गौरव बिद्रेने सौझा लोबो रेस्टॉरंट तोडफोड प्रकरणातील संशयित छोटू व इतर दोघे मिळून तिघांनी मारहाण केल्याची तक्रार केली होती. या मारहाणीत त्याचे पुढील दोन दात तुटले होते. त्याने तेव्हा सुरक्षेच्या दृष्टीने इतर खोलीत हलवावे, असेही म्हटले होते.