रमेश वंसकर
बोरी: बोरी गावातील लोकांचे जीवनमान आता उंचावले आहे. सामाजिक, सांस्कृतिक, शैक्षणिक, कला, क्रीडा क्षेत्रातही गाव आघाडीवर आहे. लहान मुले, विद्यार्थी संगीत, गायन वादनाचे प्रशिक्षण घेत आहेत. गावातील क्लब, सामाजिक कार्य करणारी प्रतिभा फ्रेंडस सर्कलसारखी संस्था आज राज्यस्तरावर प्रसिद्ध आहे. रस्ते, वीज, पाणी या सर्वसामान्याच्या गरजाही पूर्ण झालेल्या आहेत.
(standard of living of the people of Bori village has now increased)
गावातून जाणारा प्रमुख रहदारीचा रस्ता आणि जुवारी नदीवरील बोरीच्या पुलामुळे दक्षिण गोवा आणि उत्तर गोव्याला जोडणारा हा दुवा बनून राहिला आहे. आज बेळगाव, हुबळी, धारवाड, कोल्हापूर, सांगली आदी भागातून वास्को, मडगाव, काणकोण, कारवार या भागात याच रस्त्याने वाहने येजा करतात. वास्को बंदरातून येणाऱ्या मालाची ने-आण वेर्णा सां-जुझे औद्योगिक वसाहतीतून गावातून होते. म्हणूनच दिवसभर बोरी गावातील रस्ते वाहनांनी भरून गेलेले दिसतात. या रस्त्याने वा पुलावरून होणारी वाहतूक पाहता हा रस्ता वाहतुकीसाठी खूपच तोकडा पडतो.
गावातील मध्यवर्ती ठिकाणी असलेल्या श्री नवदुर्गा तलावाचे सौंदर्यीकरण, सिद्धनाथ पर्वताचा विकास, नाल्यांची स्वच्छता, शेती-बागायतींसाठी पाणीपुरवण्याची योजना चालीस लागली आहे. आरोग्याच्या सुविधाही उपलब्‍ध आहेत.
गावात सर्वत्र फुलांचा दरवळ
बोरी हा गावा तसा कृषीप्रधान. परंतु अलीकडच्या काळात मोलमजुरी आणि बियाणे, खतांचे दर गगनाला भिडत असल्याने लोकांनी आपला शेतीचा उद्योग सोडून दिला आहे. दुसरीकडे जाई, मोगरा, बकुळी, चाफा, केवडा, सुरंगी आदी फुले या गावात मोठ्या प्रमाणावर फुलतात. बोरी गावचे आद्यग्राम दैवत श्री नवदुर्गा देवी, श्री सिद्धनाथ, श्री कमळेश्‍वर, श्री नारायणदेव, श्री साईबाबा मंदिर आदी मंदिरांमुळे बोरी गावात भाविकांचा ओढा वाढत आहे.
सर्वच क्षेत्रांत गाव प्रगतिपथावर
गोवा मुक्तीनंतर बोरी गावाला ऊर्जितावस्था प्राप्त झाली असून शासनाचेही आवश्‍यक पाठबळ आणि सहकार्य लाभत आहे. त्‍यामुळे गावात विकासाचे वारे वाहत आहे. आज बोरी गाव सर्व क्षेत्रात प्रगतिपथावर असलेला दिसून येतो, असे विश्‍वंभर देवारी म्हणाले. तर, बोरी गावचे माजी सरपंच सुनील सावकर म्हणाले, भाजप सरकार आणि मंत्री सुभाष शिरोडकर यांच्या प्रयत्नाने बोरी गावचा सर्वांगीण विकास तर झालेला आहे. शिवाय सर्वसामान्यांच्या गरजा पूर्ण झाल्‍या आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
