Traffic Rule: भोम परिसरात पुन्हा वाहतूक कोंडीचा प्रश्न कायम

Traffic Rule: भोम येथील प्रसिद्ध कालोत्सवावेळी दरवर्षीप्रमाणे यंदाही वाहतूक कोंडीसोबत वाहतूक पोलिसांच्या शिट्या आणि धावपळ दृष्टीस पडली. या कालोत्सवात सोमवारी भाविकांनी दर्शनासाठी प्रचंड गर्दी केली होती.

गावामधून जाणारा महामार्ग, दुतर्फा घरे, दुकाने, त्यात फेरीवाल्यांची गर्दी यामुळे दरवर्षी कालोत्सवावेळी वाहतूक कोंडीची समस्या सतावते. फोंडा ते पणजी महामार्ग भोम गावात रस्ता अतिशय अरुंद आहे. दुपारपर्यंत वाहतूक सुरळीत होती पण संध्याकाळनंतर कालोत्सवात येणाऱ्या वाहनांची संख्या वाढल्यानंतर कुंडई ते बाणसारीपर्यंत वाहनांच्या रांगा लागल्या.

फोंड्याहून पणजीला जाताना भोम शिवाय दुसरा पर्यायी रस्ता नसल्याने या वाहतूक कोंडीची समस्या कायम सतावत आहे. त्यामुळे बगल रस्ता आवश्‍यक झाला आहे. परंतु या रस्त्याचा विषय जटिल बनला असून सरकार तसेच भोमवासीय आपल्या निर्णयावर ठाम आहेत.